JFans
JFans

喜愛在愛情、工作、教育、娛樂及社會民生等抒發自己所思所想

日本某年紅葉之旅 (1)

[好幾年沒有外遊, 加上疫情下沒能外遊, 只能翻看自家陳年日本旅行遊記並分享舊文章來抒懷]

前傳

在某年11月13日至11月30日, 去左日本18日, 諗住睇紅葉, 除左去左d熱門地方如東京, 京阪神, 奈良之外, 仲同朋友去左九州, 中間有一個人四圍行既時候, 亦有與伴同行既時候

係呀, 「又」係去日本呀, 唔少人都問我, 點解成日去旅行都去日本唔去第二度, 點解有時都要獨處好寂寞無聊咁呀~~~

我鐘意去旅行, 一來因為我想去一個「我聽唔明人地講乜, 而人地又聽唔明我講乜」既地方, 因為做乜都唔使理其他人點睇我, 只需在乎自己點睇自己(但不是去胡作非為);二來係因為去旅行會令到我可以唔使好似平時咁考慮人事關係、分黨分派搞圈子呢D太複雜既野, 只需好簡單咁考慮每日大約要去邊幾度玩, 然後再隨機應變轉plan, 雖然中途有唔少地方或見聞可能同想像中有落差, 但就係因為呢D落差, 可能會引發出一些意外驚喜

而我鐘意去日本, 有少部分原因係因為我當時鐘意睇日劇同日本組合Speed(而家都愛追日劇), 所以鐘意去日本旅行一下; 而大部分既原因, 可能係同我第一次去日本既經歷有關

呢個經歷要講番我之前某年4月既第1次日本旅行, 當時我係人生第1次去外國旅行, 因為要靠自己賺錢用自己既錢去旅行, 所以廿幾歲人至第1次去外國, 當時第1日到果度, 人生路不熟, 唔識講兼唔識睇日文, 就在我當時企o係火車同地鐵賣票機望住路線圖諗緊點買車票果陣, 有一個素未謀面既日本女仔, 佢見我戇居居一丁友, 居然主動走來用日文問我有乜野佢可以幫到我, 當時我雖然唔識聽佢講日文, 但從佢既身體語言get到佢想幫我, 但我唔識用日文答佢, 唯有用爛英文同佢講我唔係日本人唔識日文

當時我心諗, 聽完我咁講, 果個女仔應該都唔會理我了, 點知, 佢聽完我講英文, 居然試圖用英文同我溝通想睇下有冇野幫到我, 最後仲向佢男友求救同我講英文睇下有冇野可以幫到我, 佢男友英文好少少, 當佢地知我唔識點買車票去hostel附近果個車站, 佢地就即刻教我點用賣票機, 然後仲帶我去車站月台, 仲因為順路同我一齊搭車tim~~~

全程車, 我都用英文或少少爛日文同佢地chat, 其實係佢地知我第1次去日本乜都唔識好緊張, 主動搵話題同我chat, 佢地應該係兩公婆, 另外仲有佢地兩位既媽媽, 四個人剛剛由上海去完旅行番日本, 我仲同佢地講我會去日本邊度玩, 幾多歲, 做邊行; 而最重要既係, 過程中我久唔久就流露出我第1次去旅行要獨處的擔心, 但果個女仔不斷同我講”大丈夫”(日文”冇問題, 冇事既”咁解), 仲同我講”su哥而” (話我要獨處都敢去旅行好勁), 唔知點解, 平時呢兩句我覺得好hea聽到唔會太上心既野, o係果一刻, 聽完產生左少少安全感同安心左少少 ~~~

之後佢地仲好詳細咁講我知, 我hostel附近有d乜野車站, 有supermarket, 仲講我知由hostel可以點轉車出市區玩, 之後去中途轉車站, 佢地仲好好人咁帶我到要轉線既月台, 仲幫我撕走我揹在背後的背包上面既飛機寄艙「招紙」至走~~~

就係因為呢個經歷, 令我對日本有一種情意結, 之後每次去旅行都諗去日本先~~~~ 因為每次去日本, 間中都會有日本人主動來問有冇野要幫手, 甚至會主動出手幫忙(除左幫忙拎大行李上落樓梯…=.=)

好~發表完大家可能會得無聊既旅行「偉」論(可能在大家眼中係歪理)之後~唔少朋友都可能好奇我今次去日本又做左乜野呢~~留待下回分解

P.S. 當時身處日本果陣, 睇日本新聞話10月打過大颱風之後, 打傷左日本D楓樹, 仲要話冇上年咁靚, 另外, 當年既紅葉唔知點解遲左大半個月去到11月尾至開始變到全紅, 果陣我已近日本旅行尾聲見唔到全紅既紅葉景, 反而見到好正既銀杏樹黃葉景~~

#日本 #遊記 #旅遊 #旅行 #化讚為賞 #化like為coin


讀者如喜歡這篇文章 ,可於文章最下方按下Likebutton以示鼓勵及支持(若LikeCoin用戶請先登入再按下Likebutton ,最多可按5下,而其他人士也可以了解LikeCoin及考慮是否註冊使用LikeCoin )

而加入 LikeCoin 回饋創作者計劃,更有免費獲得coin的活動:

  1. 註冊一個 LikeCoin ID (邀請人請填: tracy2018)
  2. 確認已登入 LikeCoin (確認方法)
  3. 點擊五下拍手(操作參考)
  4. 完成後,你我都會獲得免費的 LikeCoin (可用來交換以太幣或現金)
CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论