JFans
JFans

喜愛在愛情、工作、教育、娛樂及社會民生等抒發自己所思所想

日本某年紅葉之旅 (8)

[好幾年沒有外遊, 加上疫情下沒能外遊, 只能翻看自家陳年日本旅行遊記並分享舊文章來抒懷]

第十二日 — 某年11月24日

果日朝在機場會合左2個朋友S君及K君後, 我即刻搭內陸機到九州福岡展開九州遊了 ^^

果日集中行福岡, 先去中洲川端運河城, 但唔係食拉面先, 而係去朋友S君好想去既姆明cafe食野, 朋友仲好開心咁同姆明公仔影相, 隔離枱既日本人仲好nice咁豪左佢個位既公仔俾我朋友影相添, 之後我地行去隔離既姆明精品店, 俾我見到一個咖啡杯幾正價錢又ok, 咁就買左諗住送俾我另一個朋友做手信 ~~ XDXD

之後我地行左中洲川端商店街同櫛田神社, 果度有唔少著左和服既小朋友同埋家人來參拜, 好得意架~~~ 晚上就去左漫步大濠公園, 最後去左運河城度食拉面啦 ~~~ XDXD, 晚上回到旅館, 我同女性朋友S君孖鋪, 而另一位男性朋友K君就一支獨秀自己訓

果幾日九州之旅, 我地沿途都不停咁互相串來串去係咁吹水, 主要都係兩位朋友互串對方, 唔知點解幾開心見到佢地互動咁好感情 XDXD, 不過間中我同女性朋友S君搭車講野大聲左少少, 俾那一位著重東洋禮儀的朋友K君間中”殊~~~”來提示, haha~~~ 我地太hyber了, 真係失禮哂~~~ :-P


第十三日 — 某年11月25日

果日去同兩位朋友去九州郊區睇紅葉, 但我已經唔記得左果度叫乜名了 (請恕我中年腦退化 :-P), 果日天氣陰天有點毛毛雨, 但不減我地郊遊既心情, 我地果日在果度留左半日左右, 欣賞到好多唔同狀態既楓葉景致, 我仲記得o係果度見到乳房神社, 俾D媽媽祈求多奶水餵BB既 (好似唔係俾女人求心口大既 :-P), o係果度仲可以遠望到九州, 個view唔錯架~~~ ^^

由於呢個郊區範圍大, 我地行完返去福岡市區都夜晚了, 就去搵左路邊檔食拉面, 之後穿過天神地下街到地鐵站搭車返hostel了 ^^


第十四日 — 某年11月26日

這一天, 出戰熊本~~~~ ^^, 呢日我地幾個坐新幹線去九州行既重點之一 — — 熊本

第一站去熊本城, 成個熊本城範圍好大, 好似仲大過大阪城, 我地果日在城內範圍周圍行同周圍影, 果度冇乜紅葉, 反而有唔少幾靚既黃葉~~~~我都影左唔少黃葉相 :-P

在熊本城大約行左兩個幾鐘, 就搭車去第二個景點 — — 水前寺, 果度相對熊本城冇咁多人去, 亦冇東京既公園咁大咁多野睇, 不過果度D景都唔算差~~~ ^^

晚上dinner完回到博多站, 站外已經著左Xmas燈飾, 我忍唔住影左幾張相至繼續走~~~ 我個人幾愛睇同影日本既燈飾, 所以一見到會忍唔住影 :-P


第十五日 — 某年11月27日

呢一日係最後一日留九州, 由於我對九重夢吊橋既強大好奇心, 於是果一日同2位朋友分開行, 自己去左九州大分行九重夢吊橋, 本身以為去果度都算方便既, 點知….原來唔方便….我來回都要搭的士, 的士費呢D衰野就唔好再提了….

不過不得不讚日本的士大哥大部分都對遊客好好人好helpful, 我去果陣搭的士, 的士大哥好似feel到我緊張, 係咁用佢有限兼唔醎唔淡既英文同我吹水, 仲要話我個樣睇落好後生, 好似16歲, 果下真係開心死我呢個而成年左好耐既人 ~~~ XDXD (事實證明, 我真係好baby face :-P); 我走果陣因為冇車, 幾經辛苦至在詢問處找到職員幫手電召的士, 個的士大哥又好好人, 見我全程望住車外既鄉郊景色係咁”嘩~~嘩~~”聲係咁影相, 唔單止唔話我, 而且仲幫手搵靚景指俾我睇等我影相 (之前去果程果位的士大哥都有咁做) ~~~ 真係nice到爆 ~~~ XDXD

去到九重夢吊橋, 同我之前諗既萬紫千紅景象完全唔同, 不過果度係另一種蒼桑壯烈既紅葉景, 係另一番景致, 又唔係冇收獲, 而係另一種體會另一種收獲 ^^, 行行下吊橋, 天氣開始差, 仲下雨, 在果度又大風又下雨, 第一次覺得凍到想講粗口 :-P, 但仍然堅持行哂成條橋睇哂d景至走, 話哂山長水遠來到嘛~~~~

行完吊橋之後, 就返去會合兩位久違了的朋友, 一齊搭飛機離開九州返大阪了, 回到大阪關西機場後, 朋友S君就立刻入閘搭飛機返香港了, 而我同另一朋友K君在關西機場食完dinner之後就「拿拿淋」到大阪難波坐通宵車到東京, 差D趕唔到車 :-P, 之後訓下醒下咁坐左8個鐘車, 第二朝醒左都仲好吽, 連朋友K君話到左都冇乜反應 :-P

機場插曲, 果晚原本朋友S君可以同我地一齊dinner至入閘飛返香港既, 但因為日本職員好似話佢個行李度有酒 (其實只係得番好少份量, 幾啖左右), 於是就要佢即刻入閘詳細咁check, check完後俾佢throw away盒酒就過到關入閘, 但再出唔番閘了….好慘…. 不過我呢一程去日本搭左幾次機都俾人要求詳細check左兩三次, 次次都係佢地職員反應過敏或check唔好, 每次都搞到唔好意思咁放我走….呢個都算係成個trip入面有點唔太happy既野了, 不過不能怪佢地職員, 佢地都係想小心謹慎D啫~


第十六日 — 某年11月28日

由於我和同行的朋友K君各有所好, 於是就協定在東京呢兩日分頭漫遊了

呢一日我去左行築地市場買手信俾家人 (俾朋友既手信一早買好左, 而家人想要既野得呢度至有), 買完周圍行下, 仲食埋lunch至肯走, 因為真係可以食到好飽又唔係話太貴 (我認為)~~~ ^^

之後去左行明治神宮, 果度入面既景唔錯架, 值得慢慢行同慢慢影相的 ~~~ 所以我都留左好耐至走 ~~~ 之後去左行代代木公園, 果度D景好正, 而且地方大, 我都慢慢行慢慢影相咁留左成三個鐘 :-P, 不過我最愛都係行國家級公園好似係國營昭和紀念公園同新宿御苑, 因為D景係最正同埋地方最大既 XDXD

之後去左表參道dinner, dinner完因為要等表參道Xmas燈飾亮燈 (去日本之前search過話呢度11月尾12月頭會亮燈, 果日見到一大堆人以為有人做show等下八下, 點知俾我等到佢亮燈, 幾開心呀~~~ XDXD), 所以在表參道等左成粒鐘至走, 亮燈果下真係好正, 好多人歡呼, 我個人比較hea咁”嘩~~~”左聲就算, 不過就影左幾張相至走 :-P


第十七日 — 某年11月29日

其實要去既東京景點已經去得七七八八, 所以呢一日可以再慢慢行下了

朝早去左淺草寺, 勢估唔到平日都咁多人去果度, 仲要有唔少係學生, 乜果邊D學生咁好可以成日去本地遊旅行既~~~羨慕~~~ :-P

之後去左涉谷lunch同行CD舖睇碟同掃碟, 雖然睇到一D我最愛既組合SPEED既碟, 但果D只租唔賣….好可惜….不過都buy左3隻SPEED既碟同埋Arashi 2隻碟, 我每次去旅行都冇乜野買, 最大出血都係買呢D二手平價 CDs去珍藏 :-P

之後去左代官山, 純粹只係去到此一遊式咁行下, 果度冇乜野睇, 可能我唔係讀fashion人, 所以對於呢個fashion人潮聖地冇乜感覺 (後來就呻笨了, 因為返來之後醒起唔記得左去代官山附近既惠比壽…=.=)

最後去多次表參道dinner同睇燈飾, 在果度留左好耐同行左好耐, 終於俾我等到佢D燈轉色影多幾張相 XDXD, 中途撞正佢果度做music station super live, 我見得閒就留低在場外等開場聽下邊個唱歌啦, 點知….係AKB48, 仲要聽得出係咪咀播聲果隻唱歌, 算吧啦~~~, 即走人去第二度影燈飾 :-P, 之後見到佢地唱完歌由後台出來門口等車, 我掂行掂過冇留低望佢地, 因為對佢地冇乜興趣 (騎呢利申: 當時自己ringtone雖然有AKB48某首歌既Ringtone, 但只係因為果首歌既旋律幾好, 而唔係因為我迷佢地, 我年紀大唔識欣賞 :-P), 之後在對面馬路見到佢地整隊人成群黑影咁在燈飾下既景象, 那一刻覺得果個騎呢構圖有D特別, 離遠影左張「人在街燈下」既相就走了 :-P

第十八日 — 某年11月30日

呢一日係日本旅行最後一日, 我呢一日都冇影相, 好似係去左東京車站內周圍行下, 行到lunch之後會合朋友K君, 就搭新幹線返大阪, dinner完就搭飛機返香港了, 回到香港係12月1日零晨, 好彩仲趕到通宵巴士回家 ~~~ ^^

#日本 #遊記 #旅遊 #旅行 #化讚為賞 #化like為coin


讀者如喜歡這篇文章 ,可於文章最下方按下Likebutton以示鼓勵及支持,若讚賞公民請先登入再按下Likebutton ,最多可按5至6下,而其他人士也可以於網絡了解LikeCoin及考慮是否註冊成為讚賞公民,若想成為讚賞公民可按以下連結︰https://likerland.app.link/?event=app_referral&referrer=tracy2018(下載APP登記註冊並通過短訊驗證後,你我還可有機會各獲 100 LikeCoin 作奬勵)


CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论