潮乜春

一個喜歡創作嘅宅人,希望可以用宅人眼光出發,講解日常的生活的大小事? 主要創作: 動漫?唔好期待我會介紹當季新番;會推介自己有興趣嘅作品 F1?當大事回顧咁樣睇 其他?相逢只是有緣

補番推介:熊熊勇闖異世界

發布於
人生第一套愛上嘅異世界番,就係今日要講嘅呢一套

如果一講起異世界番,我相信好多人都應該即時諗起《Re:從零開始的異世界生活(Re:ゼロから始める異世界生活)》,雖然我都係,不過亦都係呢套搞到我對異世界番產生抗拒。雖然好多人都當佢係神作,但係我睇咗三分鐘左右就熄咗;唔係話唔好睇,不過我真係對唔啱電波,加上我長年累月係芳文番陪伴之下,更加無心機追落去,亦都造就左我對異世界番嘅討厭。我認真睇過嘅異世界番剩係得兩套,一套係《異世界風俗娘評鑑指南(異種族レビュアーズ)》同今次要講嘅《熊熊勇闖異世界(くまクマ熊ベアー)》,前者就當然係因為車速過高而吸引我去睇,後者就係因為同其他異世界番不同嘅情節同世界觀而吸引我。

原本呢套我都無諗住睇嘅,因為見到異世界題材已經會自動跳過。不過機緣巧合之下睇到PV之後,忽然之間我就覺得好有趣,但係有趣嘅原因絕對唔係因為異世界,亦都唔係因為佢嘅戰鬥場面好吸引,而係佢講嘅食物好吸引,加上標題又無特別標明係異世界〇〇或者〇〇〇〇〇〇〇異世界XXX之類很奇怪的名字,所以都覺得可以一試。

老實講,係開播之前,我唔知點解走去買咗輕小說第一本黎睇。一係唔睇,一睇就停唔到手,睇到上癮,所以好快就買晒全套小說黎睇。我一直講唔出點解會咁吸引我,但係一睇就停唔到手,可能因為真係對啱電波?不過我一路睇心入邊OS就會不斷吐槽話應該改名做:如何用美食稱霸異世界。相對其他異世界作品,入邊嘅打鬥場面接近只佔極小部份,其餘大部份都係搵食材同埋如何享用美食,不過可能亦都係因為咁樣先至吸引到我留意。其實對於我自己來講,唔知點解我一直好抗拒嗰啲戰鬥番,甚至乎有打鬥場面嗰啲我都唔太鍾意留意或者主動走去睇,所以幸好原作小說都只係平均用1-2篇篇幅黎到講述戰鬥情況,有一種點到即止嘅感覺,唔會過分臃腫。

土地問題,只可以買電子書收藏

原作小說就之後再講,講咗動畫嘅表現先。老實講句,第一集睇嘅時候我真係滿頭黑人問號?作畫風格雖然穩定,加上有029老師加持,但係如果無睇過原作一定會問到底睇咗啲乜?無他嘅,一開頭播放已經係小說第一本接近完結嘅部份,無睇過原作嘅一定唔知道佢講緊乜,加埋最後回到真實世界的部份,除咗話咁嘅作用係為咗吸引更多人討論從而引起作品關注度之外,完全諗唔到有乜解救要咁樣鋪排。雖然係可以吸引到人,但另一方面亦都引到好多原作小說黨炎上。

雖然第二話之後就順返時間線,但係為咗可以十二集之內做完四本小說嘅內容,所以都刪減咗好多情節。我覺得有好有唔好啦,好果方面就係竟然可以睇到佢去到密利拉鎮;唔好就係中間都有幾件重要嘅事都無講。我作為一個原作小說黨,不滿就點樣都有,不過既然呢套都唔係主要講點樣係異世界稱霸,所以我都覺得佢擺咁多時間係食物同埋兩隻熊身上我都覺得可以接受。

好可愛 <3

至於開播之前亦都有好多人亦都問,究竟製作公司EMT Squared(株式会社EMTスクエアード)有無足夠能力製作呢套動畫,因為根據過往記錄好多時由呢間動畫公司製作嘅動畫都會有好多崩壞嘅問題出現。至於十二集之後,雖然唔可以算得上神作,但最少無令大家失望,大家預期嘅崩壞情況雖然有出現,但係相比起以往其他作品就減少咗好多,相比起過往表現絕對係合格。

雖然開播前,大家從觀看製作委員會的名單中都可以睇得出呢套誕生基本上唔係咁容易,但倚着超低成本製作,而且BD第一卷銷量只有大約1800隻,但仍然可以在12集播放完結之後即時宣佈二期製作決定,這亦都可以反映目前觀眾是不是比較喜愛對這種另類異世界番有需求,正如我一開頭所說,近幾年異世界已經變成一個很濫用的題材,已經去到神仙打交嘅地步,要在這世界出奇製成可能不是要靠很多的打鬥場面,就算描述得天花龍鳳也可能沒有人喜歡看,這種天然治癒系的感覺更得人喜歡。另一方面咁樣講,其實大家都睇得出呢一套嘅資金其實真係好低甚至乎嚴重不足,如果正常來講,一集動畫製作大約需要1億至1.5億日圓,但係呢套係開播之前已經有人爆料話呢一套經費只有正常嘅八成到九成左右,咁所以其實領到作者都話真係無諗過可以成功誕生。

二期製作決定

之後就終於可以講返原作小說同動畫分别,雖然我明白要係12集之內講完四卷小說好似真係好過分,甚至乎當中少咗好多劇情,不過就結果來講,又唔係真係特別差。唔係話刪減左啲內容好好,當然我個人亦都係絕對反對咁做,但係相比起好多其他嘅動畫,佢刪減嘅內容其實拿捏得好好,唔會話太影響整體觀賞性,甚至乎之後再睇返小說都唔會有太突兀嘅感覺。所以如果真係有時間,真係不妨攞起呢本小說,睇吓呢一本另類嘅異世界番。

我知道今次好似又無講過12集嘅內容,不過我始終覺得異世界番唔係每一個人都啱,如果真係想知道佢講乜嘅,我相信你自己YouTube睇好多唔同嘅人評論會快好多,但係我始終都係鍾意係用側邊嘅角度黎推介大家,咁所以今次就淨係希望大家可以慷慨解囊拍5下手已經足夠,希望可以作為繼續支持我創作嘅原動力(土下座

喜歡我的文章嗎?
別忘了給點支持與讚賞,讓我知道創作的路上有你陪伴。

CC BY-NC-ND 2.0 版權聲明

補番推介:本田小狼與我

補番推介:我被綁架到貴族女校當「庶民樣本」這件事

4

看不過癮?

一鍵登入,即可加入全球最優質中文創作社區