潮乜春
潮乜春

一個喜歡創作嘅宅人,希望可以用宅人眼光出發,講解日常的生活的大小事? 唔理係動漫、F1、科技、定係生活上芝麻綠豆嘅小事,星期六準時0000更新~

淺談P.A. Works 工作女孩系列第四部:白沙的Aquatope

如果說《櫻花任務》是工作女孩系列的滑鐵盧之作,那麼今次《白沙的Aquatope》是不是又再一次賠了夫人又折兵?

首先同大家介紹吓咩叫工作女孩系列(働く女の子シリーズ)。工作女孩系列係日本動畫製作公司P.A. Works 引以自豪的系列,之前有三部著名的作品,分別係:2011年的《花開物語(花咲くいろは)》、2014年的《白箱(シロバコ)》同2017年的《櫻花任務(サクラクエスト)》,而第四部作品就係今次要介紹嘅《白沙的Aquatope(白い砂のアクアトープ)》。雖然每次也只是說一群女孩子在努力工作當社畜的日常生活,但因為作品嘅優美程度同接近完全無誤嘅畫風,所以每一次推出工作女孩系列,都會令唔少人人十分期待。

但係,容許我花少少時間,講吓點解上一套作品《櫻花任務》為什麼會成為了滑鐵盧之作,不過當然都係純粹我個人觀點啦。首先,如果要以區域振興經濟主題黎講,其實《櫻花任務》能夠帶出呢個主題其實真係微不足道,相比起近年的《燒窯的話也要馬克杯(やくならマグカップも)》絕對係失敗。《燒窯的話也要馬克杯》雖然主要係講述日本傳統工藝美濃燒,但因為獲得岐阜縣多治見市嘅支持,去推廣傳統嘅時候亦都不忘介紹該地方嘅歷史和景點等等,令到更多人去主動了解嗰個地方;相比起《櫻花任務》,雖然成個故事係係一個架空嘅城市發生-間野山市(但其實大家都知道就是P.A. Works總部的門口:富山縣南礪市),但可惜嘅係,即使係講自己門口嘅故事,但都因為劇情實在太悶,嚴重影響觀賞感覺。雖然作畫絕對係一流,但可惜整個故事推進實在太慢,甚至乎唔係咁容易可以睇得到每一集嘅重點,所以其實好多人睇到一半都已經放棄。果嗰時候《櫻花任務》作為我第一次接觸嘅工作女孩系列,老實講一路睇落去,其實我真係覺得好痛苦。當然,作畫絕對係令我靚到啞口無言,相比起同期其他作品,例如:《不起眼女主角育成法♭(冴えない彼女の育てかた)》《月色真美(月がきれい)》《NEW GAME!!》等等,絕對係望塵莫及,但《櫻花任務》劇情對於整個工作女孩系列彷彿蒙上了陰影。所以即使到咗今日,《櫻花任務》仍然被視作工作女孩最失敗嘅作品,對我來講甚至乎係少數唔會主動拎返出嚟重溫嘅作品。即使我之後有補回《花開物語》同《白箱》,但因為《櫻花任務》在太"傑出",所以我真係唔覺得好似其他人咁講係神作。

《櫻花任務》宣傳圖

去到2020年10月,雖然有麻枝准先生嘅《成神之日(神様になった日)》,令到P.A. Works霎時間聲名大噪,而且繼續保持一貫嘅優質畫風,每一集作畫近乎可以媲美甚至超越CloverWorks,但再一次可惜嘅係,麻枝准老師今次創作嘅作品與佢嘅成名大作《Angel Beats!》相差太遠,應該說是雷聲大雨點少,贏口碑輸收視,未能夠再下一城,不能相隔10年後再一次成為神作。我咁樣講唔係因為我唔鍾意麻枝准先生,亦都唔係唔鍾意佢嘅作品,只係因為諗唔到相隔10年,未能夠再創高峰而感到可惜。雖然亦都有唔少人開播前講,今次兩者再度合作絕對可以成功,但可惜嘅係彷彿再一次將P.A. Works打進低谷,好老實,現今BD銷量已經決定咗一切,即使有精美嘅畫風,但係內容失敗其實都係無用。不過容許我咁樣講,如果依家要創作一套類似《Angel Beats!》題材嘅作品,我相信都未必會有當年咁大反應,畢竟依家市場上比較需要速食同萌系嘅作品。

如果你睇到呢度都仲未咁上一頁離開嘅,真係衷心感謝你,因為我諗都未有一半。亦都希望你可以喺下面拍咗5下手先,作為繼續支持我給原動力,ありがとう!

好啦咁講返去今次呢部作品先,就係《白沙的Aquatope》,首先我想講咗我自己睇完24集之後有咩感覺先,就係:那一個我們熟悉的工作女孩系列回來了。以下內容亦都會大有大量嘅個人見解,順手當埋評論啦Www亦都當然啦,介紹舊番,一定會牽涉大量劇透,請酌情觀賞。

首先講吓點解我會覺得《白沙的Aquatope》係近年來一套非常特別題材嘅作品先。其實主要係因為用沖繩做題材嘅作品已經唔係好多,加上會選用水族館黎到做動畫嘅作品少之又少,所以其實係開播之前已經吸引到我嘅目光注意。其實近年黎以沖繩嘅作品其實真係唔多,我有睇過嘅其實就真係只有巜遙的接球》同《白沙的Aquatope》,當然仲有客串兩集嘅巜戀愛中的小行星》,但其實真係唔多。對於我自己來講,相比起東京或者大阪啲大城市,我其實出去旅行都幾鍾意去啲鄉下嘅地方,幸好嘅係喺疫情之前我最後一次能夠去旅行嘅地方就係沖繩,沖繩呢個地方中嘅比我印象其實真係好微妙,雖然我知道佢係日本境內,但彷彿回到舊時嘅日本,唔係只城市構造或者街道風情呢啲,而係有一種好特別嘅人情味。今次嘅作品主要係南城市,而我亦都有幸曾經路過同食飯,可能係因為一個好細嘅地方,感覺人同人之間嘅聯繫其實真係好豐富,鄰里關係十分融洽,我同行朋友喺度玩貓嘅時候,我走咗去買嘢食,跟住同個店長傾咗一陣計,之後佢好人到邀請我哋去佢屋企食午餐,雖然可能只係一啲好少嘅事,但係嗰種人情味我喺其他地方搵唔到。正如《白沙的Aquatope》第一、二集,風花離開東京去到沖繩嘅時候,雖然都係無家可歸,但幸好空空琉收留咗佢。我唔係話放人之心不可無,但製作組連啲咁細微、差唔多已經喺現代社會消失嘅"感覺"可以重現,實在感動。

另一方面,其實用水族館做題材嘅作品其實真係唔多,甚至乎可以話係無(最少我未睇過OK?)。其實好多動畫製作公司,都會盡量避免牽涉水族館呢一類咁複雜嘅題材,因為牽涉到太多唔同嘅作畫,例如每一條魚、每一個水族箱、每一個展區同每一個遊客等等。即使類似CloverWorks同京都動畫呢一種擁有大量資金嘅製作公司都好,都唔會希望創作呢一種系列構成過度複雜嘅動畫,一來難以一直保持每一集畫風相同;二來就係需要大量時間在每一集播放之前進行大量調色,以避免有太大的唔差出現;三來就係呢一種原創動畫,如果太失敗(當然係指BD銷量),絕對有可能一陣不起,所以基本上不太會有可能有公司願意做這麼大的投資。但幸好,今次我哋有幸可以見到呢一套作品嘅出現。至於24集之後,整體表現如何?正如我一開頭咁講,就算你對動漫無興趣都好,佢嘅畫風亦都絕對能夠令你眼前一亮。

之後就講吓兩位女主角:海咲野空空琉(海咲野 くくる,下稱:くくる)同宮澤風花(宮沢 風花,下稱:風花)。介紹咗くくる先,一個沖繩縣民,因為自細就喺家族經營嘅水族館長大,所以好鍾意海洋生物。但可惜自細父母傷亡,所以只可以從祖父母身邊長大,原本也有一個家姐,但可惜也胎死腹中。不過即使面對咁嘅坎坷成長,仍然可以勇往直前,甚至乎可以喺一間差唔多結業嘅水族館入邊擔任左兩個月嘅館長,真係一個幾得意嘅人。我唔係話唔應該唔讀書而走去發展夢想,而係好似くくる咁樣喺嗰個年紀就知道自己想向咩目標發展嘅人其實真係唔多,即使好似之前上面講嘅《櫻花任務》,女主角都要去到後面先至覺醒自己嘅目標,就算係現實世界定係動畫世界都好,真係好少見可以咁早就知道自己想向着邊個方向發展目標嘅人。雖然最後都係要結業同埋轉去另外一間水族館工作,但係喺整個故事後面我哋可以見到即使工作係佢幾唔願意、幾困難都好,甚至乎係完全接觸唔到佢最鍾意嘅海洋生物都好,佢都咬緊牙關做落去,雖然最後有機會可以選擇同海洋生物一齊工作,但都仍然選擇留喺營運部,容許我引用以前曾經聽過嘅一個電台節目主持嘅一句說話:你返緊嗰份工,有一百樣嘢要做,但你鍾意做嘅可能只係得兩、三份,咁唔通真係唔使做咩。我諗對於くくる來講,我哋可以睇到佢最後嘅心態其實完全唔同晒,雖然都係有錯漏百出,但已經從討厭變成享受,完完全全變成了一個社畜(X 完完全全明白水族館唔單止淨係要照顧海洋生物,後面仲要有一大班人去支持成個水族館嘅運作,佢就係想成為其中一人。呢種心景變返我諗有好多人都無,甚至乎好多人都選擇放棄,但妖真係可以能夠留喺個你鍾意嘅地方工作,我相信就算份工幾辛苦都好,我諗正常都會繼續留低捱落去,總有會有出頭嘅一日。

你們去結婚好嗎

講完くくる之後就講吓風花,本作咗第二名女主角,亦都算係くくる無血緣關係嘅姐姐。前偶像,因為不想回家,偶然嘅機會後見到沖繩某間水族館嘅廣告,所以就決定飛去沖繩逃避現實。機緣巧合之下,去咗くくる營運的水族館,之後便要求留下來工作,並入住くくる家中。之後係くくる營運嘅水族館結業之後,亦都返咗去盛岡老家完成高中課程,並且考獲潛水執照。之後返咗去沖繩,陪同くくる喺新水族館工作,最後更加飛到夏威夷研修。好啦咁就大約講完佢24集嘅活動,可以睇得出其實佢係一個希望成為可以俾くくる依靠嘅人,喺開頭嗰度可以見到佢已經下定決心要成為くくる嘅姐姐,佢知道咗佢哋兩個係無血緣關係,但彷彿佢係想成為一個避風港,俾くくる可以放心對住佢撒嬌。之後從佢決定返去沖繩繼續生活可以睇到佢完全無諗過放棄くくる,好好咁成為佢姐姐;雖然最後毅然決定選擇去夏威夷研修,但係我哋開啟出佢去同唔去之間第一樣考慮嘅就係くくる,可以睇得出係佢心入邊究竟くくる有幾重要。喺開播之前,有好多人喺度笑稱,既然佢係東京出生嘅前偶像畢業,會唔會好似某系列學園偶像咁樣,唱歌跳舞組成樂隊拯救水族館?不過好好彩呢件事係絕對無發生啦,係呢個弱肉強食嘅世界,其實佢就係好似一個縮影,依家成功嘅一線聲優有上面,究竟係踩住幾多失敗聲優嘅屍體上嚟,其實大家都知啦……

大約咁講完人物介紹,不如就講吓劇情。主要分咗兩部份,1-12集:GAMAGAMA水族館同13-24集:銀河水族館。首先講咗頭12集先,正如我上面咁講,舞台設係沖繩縣南城市一座家族經營嘅水族館。雖然我就未去過,但係睇咗好多人嘅勝地巡禮,我覺得好似同現實一樣咁。不過同現實唔同嘅係,動畫主要係講述你跟水族館最後嘅時光,因為設備老化、資金不足、同埋為避免重新水族館競爭而結業。雖然風香加入嘅時候水族館只係得返兩個月時間,但係仍然各出奇招,希望可以保留落嚟。但可惜嘅係,即使佢哋兩個用盡一切方法,仍然難逃結業嘅命運。不過喺呢12集入邊,我哋可以睇得出佢兩個其實已經唔再係以前咁樣陷入迷惘。くくる因為唔想失去碩果僅存同父母曾經一齊留低腳印嘅地方而用盡一切方法挽留;風花因為中途接到電影拍攝邀請而曾經考慮離開,佢呢兩件事變其實我哋都會睇到佢哋真係好迷惘。雖然兩個決定對佢哋人生其實都唔會有太大嘅影響,但我哋可以睇得出最後佢哋都係憑着雙方已走出困局之中。可以睇得出佢兩個其實係靠住一間咁細而且好快就要執笠嘅水族館倚靠對方,從而面對各種難關;而經過咗颱風天停水停電之後,くくる終於明白係時候放手。我唔係想話呢一段佢地兩個違反咗幾多法例,而係想講即使知道得返有限嘅期限都好,明知改變唔到結局,但都希望可以盡最後嘅時間發光發亮,嗰種人物嘅心境變化其實真係係近年動畫來講來講真係好少見到,畢竟依家主要嘅作品都係賣萌為主。我諗其實就算現實都好,好多人見到咁嘅情況,都係寧願求求期期渡過最後的日子,而唔會選擇發光發亮咁辛苦渡過最後的日子。我唔係想話佢改變咗我,但最少我已經成功墮入左個故事入邊,因為睇到佢結業嗰度我真係有少少眼濕濕,唔知點解有少少唔捨得嘅感覺。


之後就去到13-24集:銀河水族館。一間截然不同嘅水族館,基本上最新嘅設備全部齊全,絕對係天堂同地獄嘅分別。不過我要講嘅就梗係唔係有咩分別啦,咁我當然繼續係劇情間加大量劇透。其實喺第13集一開始,我哋見到くくる竟然唔係分配去海洋生物有關嘅部門,而係被分配去咗負責營運嘅部門,其實果下絕對係好大衝擊,因為真係無諗過製作組竟然會咁爆炸,不過當然係當初係咁樣諗啦,之後亦都有所改觀,不過嗰一刻個感覺真係好喜出望外。不過亦都係因為佢當初係主要負責照顧生物嘅一方,依家改為負責日常營運嘅部門工作,正如好多職場新人一樣,我哋可以見到係多次嘅錯漏百出,不停俾上司責罵。甚至乎去到第13集結尾嘅時候,我哋可以睇到佢一度有諗過放棄,辭職離開。但好彩嘅係風花及時回到沖繩,係最需要嘅時候再一次成為咗くくる嘅姐姐,再一次用姐姐嘅身份支持佢。之後雖然都係雙方各自喺各自嘅領域工作嘅故事,然後就係日常生活,但係可能製作組知道咁樣落去太悶,所以喺第17集,專登脫離日常工作環境,製作咗一集講述幾個相熟員工放假發生嘅事。相比起崩緊嘅辦公室生活,絕對係天淵之別。係呢12集入邊,劇情主要放咗係くくる身上,例如臨時展覽同埋婚禮策劃,我哋都可以見到即使くくる錯漏百出都好,仍然盡力務求完美,雖然每一次活動都仲係有少少遺憾咁樣完結,但係最後佢自己可以得到佢上司嘅讚賞,絕對係贊同咗佢嘅努力。不過最後其實估唔到風花會選擇去夏威夷研修,畢竟佢一直都話要成為くくる姐姐,唔會再次離開佢身邊。唔可以話風花無成長,而係佢係為咗成長而去夏威夷研修。正如好多動畫一樣,最後當然係大團圓結局,但係可以睇得出即使くくる身邊再一次出去了風花,但係仍然會繼續努力留係營運部工作而非選擇回到照顧海洋生物, 可以睇得出一直以來支持くくる嘅唔係其他人,而係風花。因為雖然唔能夠再好似以前咁樣親身照顧可以海洋生物,但卻係用另外一種方法黎都守護牠們。呢一種諗法嘅改變,我相信就係風花帶比くくる嘅。

全員集合

其實講到呢度,我都唔知我係介紹緊劇情定係評論緊當中嘅劇情,不過我當溝埋一齊做瀨了牛丸啦,咁我之後可以講少啲。好啦,咁就大約講完劇情同我個人嘅大約見解啦,跟住就講吓其實成套動畫對我嘅感覺。首先佢都繼承咗《左櫻花任務》好嚴重嘅問題,就係中間劇情太慢,甚至乎可以話係拖,有啲影響觀感。雖然係原創作品,我哋無辦法知道知道之後劇情係點,但真係咁樣拖法,都好多原本有心想睇嘅人睇到第四集之後已經開始放棄,真正嘅三集定理,留下來的大部份都係工作女孩系列真粉。其實一開頭大家都已經睇得出GAMAGAMA水族館結業其實都只係一個時間問題,相比起之後銀河水族館嘅劇情,其實可以感覺到製作組反而比較花更多嘅精力喺前面嘅劇情。雖然無論前面12集定後面嗰12集劇情都係偏向慢熱程度,但係相比起依家好多都係速食嘅動畫其實已經好好多。我唔係話咁樣好唔好,而係我覺得應該要兩面咁睇,好過方面固然就係可以比大家有更多時間了解當中嘅人物設定同埋畫風嘅細膩程度,但正如我一直都係咁講,唔好嘅地方就係,其實如果你睇返轉頭,你會發現當中嘅主線故事其實好似唔係好多,甚至乎你都可以數得出,所以其實咁樣係唔係一件好事,我諗真係睇你本身對呢個作品有無愛。不過可能製作組知道我哋實在太悶,所以喺第17集專登整咗一集唔同嘅內容俾我哋,就係講述一班員工係放假一齊開party嘅集數。正如我一直都咁樣講,原創動畫好睇嘅地方就係因為你永遠唔會知道之後嘅發展係點,所以其實真係好兩極,鍾意嘅人會好鍾意,唔鍾意嘅人可能會等完晒之後一次過追番,或者真係唔會再接觸呢一類作品。至於你問我鍾唔鍾意,我既然都介紹得比你,咁我梗係鍾意呢一套動畫啦。

不過又咁講,雖然開頭12集總係有少少遺憾咁樣完結,但係去到後面嗰12集,其實好多人都係有少少反感,唔係因為佢嘅畫風,係因為佢嘅人設:くくる嘅上司。係,無錯,雖然佢嘅上司絕對係依家各行各業中上司嘅"典範"-正宗嘅〇街(我呢度呢就合家歡娛樂台嚟㗎,咁有啲字太粗俗就自己飛咗佢啦),但其實真係好多人都冇諗過竟然要喺動畫都要見到個咁嘅上司。雖然佢係成功推動くくる成長,由一個細路變成一個大人,但係既然睇得動畫,我個人就梗係希望可以放空個腦唔使諗,比自己可以暫時逃出日常生活,好好咁放鬆一下,但係睇嗰陣又彷彿好似見到現實生活會面對嘅問題,所以其實係好矛盾。不過呢,我諗我地每一個人後面都總係會經歷過類似呢一類嘅成長,所以其實諗返轉頭,就算我幾討厭呢個角色都好,但係或多或少都會勾起返當年我成長嘅回憶。不過我要講返先,我由始至終都係好唔鍾意呢個角色。

上司嘅霸氣

最後亦都容許我咁樣講啦,P.A. Works有今時今日仍然可以喺呢個競爭咁大嘅市場入邊仍然屹立不倒,絕對得來不易,但係彷彿呢幾年就好似失去咗目標咁樣。咁不如真係修心養性,好好製作工作女孩系列,可能會容易吸引返一班人留意,總好過依家三不像嘅情況。而我自己亦都相信啦,工作女孩系列應該會繼續發展落去,畢竟呢個先至係佢嘅招牌。

如果大家真係有興趣嘅,不妨睇吓呢篇文章,可以透過Google Maps睇返其實大部份嘅地方同作品都係一模一樣,另外就附上呢個幾可亂真嘅水族館網站。 最後最後啦,其實去到中間我都已經唔知自己寫緊乜,因為中間實在太忙,所以我係由2021年12月30號,寫到2022年1月13號先完成晒,所以原諒我啦,我諗都太多1999,不過我真係唔想再執過。anyways,再次多謝大家睇到呢度,希望如果你真係有時間嘅不妨了解一下或者花少時間去睇吓呢一套作品,最後一句:再一次衷心多謝你睇晒成篇文章,希望大家可以慷慨解囊係下面拍五吓手,作為繼續支持我創作嘅原動力,にふぇーでーびる



CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…
加载中…

发布评论