潮乜春
潮乜春

一個喜歡創作嘅宅人,希望可以用宅人眼光出發,講解日常的生活的大小事? 唔理係動漫、F1、科技、定係生活上芝麻綠豆嘅小事,星期六準時0000更新~

2022年1月選購 Router 記錄

我真係無諗過,竟然會有一日,將自己揀Router嘅紀錄寫出嚟,不過而家市面上實在太多宣傳文章,難以有公正持平嘅評論,嘅如都係咁,不如就將自己由尋找到實際採購整個過程寫出嚟,希望可以幫到大家Www

講明先,我完全無任何人或者廠商贊助(我亦都希望有Www),除咗所有Router品牌之外,其他品牌都會作輕微處理;而最後我亦都係實際使用真金白銀買下來的。

話說自從我寫完上一篇評論之後,正當我我係住滿腔熱誠諗緊下一篇文章係寫咩嘅時候,突然我屋企人同我講世界末日。需要明白,對於現代嘅都市人來講,世界末日就係斷Wi-Fi嘅時候。雖然我未係一個過度成癮嘅網絡使用者,但係如果缺乏了Wi-Fi,肯定會帶來很多的不便。咁你可能會話,依家手機網絡咁方便,咁絕對可以用自己部電話share出嚟用。係你講得無錯,但係我自己一部iPad,一部PC,一部MacBook,加上屋企人一人一部電話同埋加上大量嘅唔同裝置,例如電視同Apple TV等等,同埋兩部NAS,自己用自己嘅電話share出嚟絕對係唔可行,咁所以唯有都真係走去買部新嘅Router。

首先講吓我舊嘅Router,我依家用緊嘅係Linksys WRT1900ACS,我記得係2017年年頭買嘅,買嗰陣好似出咗都無幾個月,嗰陣我記得係仲送咗$500超市禮券,所以好似都係~$1000左右,嗰陣時買落其實就有少少後悔,因為嗰個年代呢一部算係比較高級少少嘅Router,但係好似因為隔咗無幾耐就出咗新版本,不過既然買咗就繼續用落去。本身頭三年都無乜問題,但去到2020年8月左右開始出現唔穩定,咁反正都唔諗住拎返去原廠維修,所以就刷第三方軟件(好孩子應先考慮是不是刷第三方軟件,因為有機會牽涉保養問題,或者引致官方拒絕保養,同埋係需要有一定知識基礎才可以順利進行)。開頭選擇用DD-WRT,但幾日之後發熱問題更加嚴重,所以改用OpenWrt,減低Wi-Fi功率輸出後,勉強都可以繼續使用,幸好一直過熱情況也只是偶有出現,尚未至於影響日常使用。但是一踏入2022年,正當我準備上一篇文章嘅時候,開始發現Wi-Fi經常斷線,而且5Hz的Wi-Fi更加經常無故消失,本應打算過年後先至買新嘅Router,但係諗唔到竟然情況快速惡化,雖然未去到不能使用嘅地步,但係因為經常斷線嚴重影響日常使用,即使使用有線連接也如此,所以迫於無奈之下只好打開Google,查看合適的替代品。

舊嘅Router:Linksys WRT1900ACS,已經可以睇到有歲月嘅痕跡

首先我揀咗牌子先,如果唔係咁樣做肯定唔使收窄範圍。乜link 同乜乜link呢一類牌子根本就唔會考慮,一來就係品牌問題,二來就係主要都係用Intel CPU。如果喺電腦入邊,我絕對建議用Intel CPU;但如果係Router,除非係商業級使用或者在機房使用,否則我不太想考慮Intel,因為為咗有更好嘅散熱效果,好多時會CPU會主動降頻,而且能夠調校嘅範圍也不大(Wi-Fi頻率),而且將來過咗保養之後,如果我想再一次刷第三方軟件,Intel的選擇少之又少,而且可以刷的機種實在不多,所以根本不會考慮。至於二手,如果係電腦用嘅CPU,我絕對贊成你去買二手,因為會壞嘅機率實在唔多,雖然唔係話無,但正常用真係好少會聽到壞CPU;但如果係Router,因為Router長期處於高熱狀態,如果上一手用家使用時候沒有提供足夠嘅散熱或者經常沒有重新開機,絕對係會影響表現,加上科技日新月異,呢啲梗係有新買新比較好,反正仲有一日家裏嘅設備都會逐漸升級,所以長遠計都係買新嘅比較好。至於買行貨定水貨,亦都正如我頭先咁講,始終Router同雪櫃一樣,都係一樣長期會開啟嘅電器,而且會產生大量熱量,雖然買水貨可以平接近一半,但係為咗安全同埋將來售後保養,所以我都係寧願俾貴啲買行貨,買個安心,同埋有咩事真係要換都可以直接拎去香港指定嘅地方維修或者更換,相比起寄返去原產地一定快同方便好多。

咁樣篩選完之後,突然之間發現自己嘅List入邊得返幾個牌子選擇。我同大家一樣,都係住喺啲2、300尺豆腐潤咁細嘅屋入邊,所以Mesh 呢樣嘢可以唔使諗。經過千挑萬選之後,最後剩返ASUS 、Netgear同Linksys比我自己揀。本來我都諗住繼續用Linksys,但係發現介面始終十年如一日,唔係話唔好用嘅,只係我用過之後,覺得有少少唔人性化,簡單啲講即係唔 User-friendly,所以又可以唔使考慮。(呢個原因亦都係點解我會咁努力鑽研刷第三方軟件嘅原因,因為好多其他牌子本身就有嘅功能佢係完全都無)

牌子之後先繼續揀,而家揀咗第二個重要嘅嘢先,就係Wi-Fi 5、6定6E。正如我上面咁講,科技日新月異,有新嘅梗係買新野啦,但可惜嘅係,Wi-Fi 6E香港好似都仲正式未批准使用,咁所以淨係得返Wi-Fi 5同W-Fi 6揀。Wi-Fi 5 即係大家熟悉嘅802.11ac,而Wi-Fi 6就係目前最新嘅802.11ax。其實呢就好尷尬,如果我用相同價錢,都係大約$1500內,如果買Wi-Fi 5嘅設備,就絕對可以買到接近旗艦級嘅設備,畢竟已經係2013年推出;但如果買Wi-Fi 6,最多只可以買到高階嘅設備,不過既然我都用緊iPhone 13,咁不如真係唔好虐待自己,都係買Wi-Fi 6嘅設備,感覺上可以用多幾年,比較化算。

可能對於好多人來講,Wi-Fi 嘅速度都好重要,所以絕對希望可以買更加高級同更加靚嘅Router從而提升速度,但對於我自己來講,穩定先係最重要。不過話說慚愧,我雖然係用最新嘅iPhone 13 Pro,但係我自己嘅電話月費計劃就係用最平嘅LTE網絡,反而我屋企人係用收唔到5G嘅電話用5G網絡,所以我比較着重於穩定方面,因為就算你比到一個幾快嘅速度我都好,但係如果唔穩定,成日斷線,咁對我反而係一個影響。咁當然啦,呢個世界邊有咁大隻蛤乸隨街跳,又想平又想靚嘅選擇其實真係唔多,加上對我自己來講,Router始終都算係消耗品,我又唔捨得買太貴,同埋呢啲用幾年就會換,所以對我來講只要唔好太貴,表現中規中矩已經可以接受。經過咗一輪嘅篩選之後,其實我心目中已經得返ASUS AX58U/AX3000同NETGEAR RAX50選擇。首先呢我想講ASUS AX58U 同AX3000 規格、重量、制式等等完全一樣,我當初為去咗搵佢地分別真係搵咗好耐,結果最後發現只係喺美國銷售都係全球銷售嘅版本名稱唔一樣,但更加神奇嘅係兩個版本喺香港都係完全可以買到,唔單止價錢一樣,而且優惠都是一樣,咁點解唔可以同消費者講明就係一模一樣嘅產品,係都要專登整多個型號出嚟令到人覺得好似有多一個選擇。不過點樣都好,我始終都係要作出選擇,所以無謂再糾結係呢啲細節上面。

其實如果以價錢黎選擇,其實真係好難分出高低,因為綜合各大銷售地方嘅價錢,兩個型號相差其實真係唔超過$100,有啲地方甚至乎只係差幾十蚊,嗰一下真係令到我選擇困難症發作。既然價錢都差唔多,咁不如就比較大家唔同。其實我搵到最唔同嘅地方就係兩個輸出頻率唔同。NETGEAR Wi-Fi輸出最高速度理論上可以達到4800 Mb/s,但ASUS 最高速度理論值只有2402 Mb/s,明顯相差了超過2300Mb/s。雖然如果從數字上來講,NETGEAR絕對係優勝,但係亦都代表我長期宅喺屋企嘅我長時間都會接收到好強勁嘅Wi-Fi,我雖然之後我都會調校到最弱嘅輸出模式,減低輻射接收(?),加上我屋企擁有智能家具嘅設備係零,而且將來亦都唔打算購入,所以感覺用唔盡好似有啲浪費;加上自己本身持有NETGEAR M1(旅行用嘅Router),雖然唔可以話NETGEAR果個介面唔好用,相比起我用緊嘅Linksys已經多好多功能,但係有我好多想要嘅功能唔可以即刻搵到出嚟,加上好多人都話ASUS個介面唔錯,咁所以其實我自己心入邊都已經打算買ASUS。

不過亦都要咁講,如果到時真係無貨或者價錢相差太遠,要我考慮返另一個牌子絕對無問題,不過可惜結果……

如果你睇到呢度都仲未咁上一頁離開嘅,真係衷心感謝你,因為我諗啱啱先過一半。亦都希望你可以先喺下面拍咗5下手先,作為繼續支持我給原動力,ありがとう!

新舊Router 對比 左:ASUS TUF-AX3000;右:Linksys WRT1900ACS

好啦,我終於比較完終於可以出去買啦。但下一個問題就係去邊度買。雖然我屋企去高登同黃金都只係大約15分鐘左右車程,但係始終我手頭上無咁多現金,同埋我唔想比現金Www,咁所以就轉去屋企附近嘅大型電器鋪睇吓先,如果價錢相差太遠就出去買,反正都只係差程車。我屋企附近嘅大型電器鋪就係凶宅,咁所以就走咗入去睇。應該點講,唔係無選擇嘅,只係太多嗰啲乜乜Link同埋貴到飛起,超過$3000嗰啲Router。正當我心灰意冷之際,我眼尾見到有AX3000呢個價錢牌,而且個價俾我諗嘅仲平,嗰刻真係以為自己好好彩,但係睇真啲,原來前面仲有"TUF"三個字,即係代表係電競嘅產物。我要講一講先,我個人對於電競不持有好感態度,但係亦都未去到反感嘅地步,我唯一一個有興趣睇嘅電競就係F1 E-sport,不過前提當然係要我有時間先會走去睇吓,如果無時間真係唔會走去睇;不過我淨係會留意F1,啲咩LOL同FIFA真係一啲興趣都無。好啦咁返去正題,$999嘅售價絕對係吸引,但係因為突然殺出一個程咬金,搞到我要專登搵個地方去了解吓有咩唔同先。

一係唔睇,一睇真係嚇死。呢一個型號最先推出嘅就係大陸,之後先至推出國際版。果一刻其實我真係諗咗好耐,一來就係唔想買到大陸版,因為好多功能用唔到同埋會有好多不知名嘅加速器;二來原因就係你懂的;三來就係上網睇到如果真係買咗大陸版,香港係唔會認保養呢個問題,如果真係有咩事,保養真係一個好大問題。不過既然呢個價錢令到我真係心郁郁,咁心動不如行動,最多都係買多個。不過好彩係咁短時間之內我都可以順利搵到不同文章話點樣分辨國際版同大陸版,就係如果國際版個公司地址會係台北,同埋個外盒包裝主要係用英文,同大陸版使用簡體中文完全不同,單憑外盒已經分到,而且我亦都相信,凶宅應該唔會將大陸版嘅Router專登放入國際版嘅外盒入面,畢竟佢都係打開門做生意,有咩冬瓜豆腐真係可以告到佢甩褲,咁所以我都係決定走返去買。講開又講,經過咗我超過一個鐘嘅比較之後,發現規格、輸出功率等等全部一樣,唯一唔同嘅地方就係TUF版本比原本版本比較高、比較重同埋Router外殼Logo變咗一個有翅膀嘅標誌之外,基本上係完全一模一樣。

國際版嘅外盒包裝

購買之前亦都詢問咗店員究竟係咩版本,咁佢都答我係國際版,因為睇外盒都睇到,咁所以買完之後都快快脆脆行返屋企安裝。返屋企之後懷着擔心嘅心情打開,好彩一開就見到英文嘅說明書同埋官方保養証,即刻放鬆咗。咁安裝呢其實就冇咩問題嘅(硬件方面),淨係將啲線插黎插去就搞掂,之後就開機搞軟件方面。雖然而家好多新Router都可以用手機或者App安裝,但記得以前工作嘅時候有個前輩話呢啲最好都係用電腦裝,而且最好係插住LAN線,咁樣安裝就一定唔會出現問題,咁所以我都係乖乖地走去開埋部電腦搞埋剩低啲手未。

英文版本嘅說明書同保養証

打完IP,一進入設定個版面,真係令我眼前一亮。雖然近呢五、六年Router嘅初次設定已經越嚟越簡單,就算係一個電腦白痴都識得搞,但對於我來講,因為要搞好多唔同嘅嘢,例如固定DNS,設定DHCP等等,咁我都係撳咗去進階模式嗰度搞。終於搞到可以無縫連接返屋企嘅所有設備之後,我亦都順利咁入到Router嘅主畫面。一入到去其實都幾眼前一亮,雖然之前已經上網睇過好多人評論或者介紹嗰個介面,但係當真係自己親身經歷到嘅時候就發現自己無買錯。相比起其他牌子,佢介面提供嘅資訊好容易就可以睇到或者搵到我要搵嘅嘢,而且有啲係要刷第三方軟件先至有嘅功能佢亦都有,雖然可能只係好簡約嘅版本,但係已經好過無,加上係保養期內我應該唔會走去刷第三方軟件影響保養問題。

左:舊Router;右:新Router 更換前後的速度,雖然舊Router速度曾經可以接近400Mb/s,但可以見到極不穩定

~~使用一星期後心得~~

經歷咗一個星期之後,一路都運作正常,咁當然亦都相比起舊嘅Router相差好遠,而且發熱量亦都比預期低。而過咗第一日之後我亦都調低Wi-Fi輸出頻率去到最低嘅水平,但好彩我屋企真係好細,校到最高同校到最底,其實我真係感覺唔到有咩分別,因為都仲係好快。至於我之前成日面對嘅斷線問題,好遺憾嘅就係我都仲有遇到,就算係唔係插着LAN線或者用Wi-Fi都有呢個問題,不過只係發生過兩次,而且都係喺深夜時分,大約零時到一點三左右呢啲時間出現,而且只係斷線大約10秒左右,所以嗰陣時對我嘅影響就唔係真係咁大,完全係可接受嘅範圍。不過我反而諗唔明點解會喺深夜咁少人用嘅時間會斷線,但係我睇返log,完全唔似係供應商斷線,而係自己Router出現問題,但係我又記得我係網搞到自動重新開機呢一類功能,所以我都有少少諗唔明,不過既然都唔影響我日常嘅使用,所以就唔諗住理佢。

不過用咗幾日其實都唔係無缺點,首先黑色機身真係好吸塵,有少少塵喺上面都好礙眼,搞到我成日要攞隻手掃走啲塵。第二就係Router嘅天線係不可拆式,其實我上星期一開嗰陣,我以為佢咁好心幫我裝埋,但係後尾先至發現原來係唔可以拆,雖然可以減少安裝嘅失誤,但如果真係想換更加大輸出嘅天線(雖然我都一定唔會咁做),或者天線壞咗要換(雖然呢個機會好少,但絕對唔係代表無)會變得好困難或者要拎去原廠維修或者要買一個新嘅,咁樣所以其實雖然係方便,咬返直佢,校啱天線方向就可以用,但另一方面就係將來維修或者改裝會變得好麻煩。

不可拆卸式天線

至於你問我會唔會走去刷第三方軟件?咁我既然買得ASUS,可玩性當然亦都係包括其中,不過未過保養期我當然唔會咁做啦,因為我唔想有咩事要買一個新嘅,不過只過咗保養期之後會唔會咁做,就真係要睇吓到時情況,希望唔好好似變到上一部機咁要刷第三方軟件咁樣先可以勉強運作。

最後速度方面,正如我喺上面咁講,相比起快速,我更加希望係可以穩定,經過咗幾日嘅使用,速度方面絕對冇問題,雖然我已經將個Wi-Fi輸出校到最弱,或多或少都有影響,但可以長期都可以保持大約300-500Mb/s,絕對係一個可接受嘅範圍。不過又咁講,呢個價錢有咁嘅質素,其實已經算執到。雖然我唔知道係買貴咗定買平咗,但最少各方面都方便到我,咁所以我亦都希望可以用返三四年時間左右。

最後,再一次衷心多謝你又睇完一篇完全毫無營養價值嘅文章,之後應該都會keep住喺星期六更新,下星期六再見。走之前希望大家可以慷慨解囊係下面拍五吓手,作為繼續支持我創作嘅原動力,にふぇーでーびる

CC BY-NC-ND 2.0

Like my work?
Don't forget to support or like, so I know you are with me..

Loading...
4

Want to read more ?

Login with one click and join the most diverse creator community.