潮乜春
潮乜春

一個喜歡創作嘅宅人,希望可以用宅人眼光出發,講解日常的生活的大小事? 唔理係動漫、F1、科技、定係生活上芝麻綠豆嘅小事,星期六準時0000更新~

因為,我選擇咗Twitter

10年前,我絕對唔相信我竟然可以用同一個網站超過10年。10年後,我仍然覺得我當年嘅選擇係無錯,反正我都諗唔到呢個禮拜六講啲乜好,咁不如就等我講吓我與Twitter的故事。

之前係 Matters 2021年度問卷中輕微提及過,對我來講2021年最重大意義嘅時刻就係用Twitter 用咗10年,回顧呢10年入面,10年人事幾去翻新,但我對Twitter喜好嘅程度卻從未離開,不如就一齊回顧一下我用Twitter嘅歴程。

如果講品牌忠誠度呢個樣,我自己係覺得好嘅產品都會繼續用落去,例如好似我上一篇咁介紹iPhone,我由2013年開始接觸Apple iPad mini 1,係呀你無睇錯,係第一代iPad mini,而且依家都仲可以正常運作。之後就一路用Apple產品到而家,由手提電話度電腦都係用Apple,可以睇得出我對一個良好品牌有絕對嘅忠誠度。但今日要講嘅嘢係比我接觸Apple之前更加早接觸嘅科技公司,就係藍色的小鳥,又名Twitter。

唔理係10年前定係10年後嘅今日,喺香港同台灣,Facebook嘅市場佔有率或者使用人數一定遠高於Twitter,但我個人喜好是Twitter多個Facebook。雖然好多人都覺得我係異類,但係我異類我驕傲。我唔係話我唔鍾意Facebook,只係如果有得揀嘅情況之下,Twitter絕對會係我嘅首選。

使用十周年紀念


點樣認識Twitter?

大約2008-2009年左右,咁我就趁住當年嘅熱潮順理成章咁係Facebook開咗個戶口。咁之後因為我鍾意影相,所以好記得嗰陣時仲係中二、中三左右嘅我一到週末就會出街周圍影相,亦都係因為咁樣我認識咗好多唔同嘅人。所以一聲又話網絡交友要謹慎,失去都係因為咁樣我先至可以識到咁多朋友,近幾年亦都係因為咁樣先至可以識到咁多世界各地唔同嘅朋友。講返正題,咁嗰陣時識咗好多人之後,我見好多人都有用 Twitter to Facebook 呢一類Bot,所以就偶然機會之下認識咗Twitter。但當初都係順水睇,無諗住轉會去Twitter。

點解會係Twitter開帳戶?

大約係2011年2月左右,好似係農曆新年前後咁上下,我因為實在太無聊,所以就決定喺Twitter 開個Account。但嗰陣時純粹都真係無聊,完全無諗過十年之後帶比我嘅變化可以係咁多。係呀,無錯就係咁簡單,絕對無一個好大嘅契機引領之下開個Account。雖然唔係完全話無,但只係一個雞毛蒜皮嘅事,就係好多身邊嘅朋友都話Facebook成日食咗好多post,同埋成日顯示唔到最新嗰啲post,Twitter唔會有呢啲問題,所以我決定開始嘗試使用Twitter。

用咗咁多年有無啲咩難忘嘅事?

雖然就真係有好多事發生,但係難忘嘅事又點止一、兩件,容許我用長少少嘅篇幅回顧,俾我呢個老人家可以好好重溫返呢十年發生過嘅事。咁當然啦,作為一個宅,咁當然大部份嘅篇幅都係宅文化有關。

首先就唔知係巧合定真係天意,可能好多人連幾時開Facebook/Twitter呢一類社交媒體戶口都唔記得,包括我在內,但唯獨是Twitter我好記得。因為我開咗差唔多一個月之後,2011年3月11日,日本發生咗一場震撼全球嘅大地震。當時仲係中學生嘅我,其實又唔可以話無影響嘅,因為嗰陣時我係修讀緊地理,結果第二日返到學校就梗係即刻攞呢個例子出嚟上堂。不過講返點解咁記得先,因為返到屋企之後我就梗係即刻打開Facebook睇唔同嘅地方報道,但可惜嘅係睇到嘅都係兩、三個鐘頭前嘅報道,睇唔到最新消息,咁所以我第一次嘗試喺Twitter上面睇唔同嘅消息。結果一係唔睇,一睇就發現好似新世界咁。見到好多最新消息同埋唔同嘅 #tag ,雖然我就生就係十萬八千里遠嘅香港,但係我相信既然我讀得地理,睇多呢一啲資訊無壞,而且可以幫到我學習,例如海嘯衝擊所帶來的海平面上升、土壤液化等等,雖然我依家已經將所有記憶送返晒比老師,但我永遠都記得嗰日都算係我第一次咁認真咁用Twitter。

中間Twitter都仲係半放棄狀態,所以時間快轉去到2016年。可以算係一個轉捩點,因為自從呢一年開始,我開始逐漸放棄使用Facebook。時間去到2016年2月中左右,眼見LoveLive μ's最後一場演唱會就嚟要開,但係我仲未搵到演唱會飛,香港雖然都有戲院轉播,但以我當時仲係用緊8M嘅上網速度應該都係搶唔到,咁所以我同朋友商量之後,朋友叫我上Twitter試吓搵,雖然預咗都要食炒價,但係我朋友就係咁樣係一場咁艱難嘅戰爭入邊搵到一張飛,所以我抱住生命有希望嘅心態去搵。結過好好彩俾我搵到,雖然比原價貴咗超過30%,而且仲要山頂位,但係能夠參與其中實在感到十分榮幸,所以就預計一個月後出發。一個月之後順理成章咁抵達日本,去到表演嘅第一日,作為一個宅,咁當然就係一早去到會場門口排隊買會場限定商品。但係因為我去到嘅時候實在太早,所以就喺門口排隊。雖然三月尾東京嘅天氣都未算太熱,但總係有少少寒意,加上人生路不熟,所以只可以縮埋一邊喺度玩電話。但人有三急,所以我只好用爛日文同埋Google翻譯去請前後的日本人幫手睇住個位,俾我可以去廁所。咁去完廁所返嚟,反正都開咗個頭,咁我就繼續用我啲爛日文同埋Google翻譯同前後嘅人傾偈。不過好彩都係好好人,最後就梗係交換咗聯絡方法。我以為要用Facebook所以我打開咗Facebook,但係佢哋就show咗 Twitter出嚟,所以你繼續成為Twitter同Facebook呢一類社交媒體而傾咗一大輪。之後仲介紹咗我叫我用 #tag(因為已經唔記得咗係打乜,所以容許我留空)留意最新資訊。果下開始我真係好似發現新大陸咁開心,因為朝早去到嘅時候雖然用電話上Facebook一切都好順利,但係開始多人排隊之後就開始變到收得唔係好好(容許我補充少少,雖然日本電話網絡係好發達,水平絕對可以同香港睇齊,但係假如同一時間喺同一個地方有好多人聚集,收唔到網絡嘅情況比香港更加嚴重,就好似以前一打風,準備掛8號風球之前電話就會打唔通咁樣,所以如果喺日本有大型展覽各大電訊商都會安排流動機站喺附近,以避免網絡擠塞),Twitter因為只有140個字元,而且就算係網頁版或者App都無複雜嘅程序需要運行,所以就算嗰陣時我用一部iPhone 6 和iPad mini 1都仲可以收得好過Facebook。(另外亦都想補充一下,Twitter 140個字元限制是包括標點符號和空格,因為它是計算字元不是自符,簡單來講就係你會輸入一個字佢都係會佔用一個位,空格都係佔用左一個位)即使入到會場係準備嘅時候,我亦都透過 #tag 練習如何轉色,雖然最後都係喺3分鐘之內燒咗超過1,000,000円Www

返咗嚟香港三、四個月之後,有一日我無聊走咗入戲院,諗住求其搵套戲睇。最快可以入場睇嗰套就叫做《從好久以前就喜歡你。~告白實行委員會~(ずっと前から好きでした。~告白実行委員会~)》,之後我買咗飛來睇。睇完之後其實我對劇情就無乜特別印象,但係對於當中嘅音樂就真係好有興趣,咁所以睇完之後我都攞部電話出嚟搵吓 HoneyWorks 呢個團體。雖然喺 Facebook 都有介紹我甚至乎有相關嘅社團,但畢竟佢地都係活躍喺 Twitter ,咁所以我亦都開始係 Twitter 上面follow HoneyWorks。之後跟住有一日喺Twitter碌到 CHiCO with HoneyWorks,聽完佢唱嘅歌之後,我深深愛上呢一個歌手,除咗係因為佢傑出嘅聲線變化之外,更加因為佢喺Twitter上面嘅互動真係好有趣。佢喺 Twitter 上邊彷彿就好似係當大家係好朋友咁喺度分享生活嘅唔同事情,而且更加會回覆唔同人嘅留言,相比起其他嘅歌手或者聲優可能只係選擇回覆或者純粹只係貼文然後讓人留言但又不回覆,佢呢一種很肯同fans互動嘅感覺其實令我真係覺得好開心,咁佢亦都當然有回覆過我嘅留言啦。雖然我知道其他人可能受制於經理人或者經理人公司限制,唔可以好似佢咁自由,但即使去到今日,佢都仲係可以保持住呢一種模式,真係好開心。

自從2016年第一次遠征去日本睇演唱會之後,之後更加因為鍾意咗 CHiCO with HoneyWorks,順理成章咁決定飛去日本睇唔同嘅演唱會。只要我就到時間,我基本上都會飛過去睇,甚至乎2017、2018年嘅暑假我更加係睇足佢咁多場巡迴日本嘅演唱會。正所謂出門靠朋友,雖然我嘅日文都仲係無咩太大進步,但都勉強可以同人交流,咁所以亦都喺呢段時間認識咗日本好多地方唔同嘅朋友,咁當然都係透過Twitter聯絡,甚至乎係Twitter上面相約食飯。雖然2020年之後因為疫情未能見面,但係我哋都仲係透過 Twitter 繼續保持聯絡,亦都因為咁樣我嘅日文水平逐漸提升。雖然Facebook都有類似嘅功能,甚至乎可以話係更加完善,而且可以簡單咁睇到之前嘅內容,唔使好似Twitter咁樣慢慢由最新睇到最舊,但感覺 Twitter 比較似係一個即時同人分享做緊乜同咩感受嘅地方,而Facebook比較似係一本公開嘅日記咁樣。

自從疫情開始之後,我相信大家嘅生活方式都有改變。我當然都唔例外,但對我來講可能反而係一件好事。(如果趕得切,下星期六嘅文章應該就係講呢一樣野,咁所以而家容許我開個天窗先)因為喺屋企嘅時間增加,電視又無嘢好睇,連嗰個重播1993年煙花匯演嘅電視台都執咗,咁所以我決定用自己嘅方法搵日本電視台睇。咁既然我係一個宅,咁我當然係搵動漫黎都睇,而且仲要係睇生放送,即係緊貼日本播放,同時收睇最新一集。其實最初都係順水睇,但之後有一次睇緊《戀愛中的小行星(恋する小惑星)》嘅時候偶爾睇到Twitter上面有好多相關節目嘅 #tag和截圖,順水推舟我亦都成為了當中一員。係日本,我哋呢一類人稱為"實況民"(類似咁叫,因為好多唔同嘅名),而且進入左呢一個世界之後,我彷彿又好似去到一個新世界咁,又認識咗一班志同道合嘅朋友。雖然大家素未謀面,但係喺Twitter面前,大家好似可以透過動漫打破語言同地域嘅隔膜,好好享受大家都鍾意嘅動畫。

除咗動漫之外,我自己亦都鍾意見網球四大滿貫賽事、F1、MotoGP同環法單車賽。以前因為工作嘅關係,基本上無可能坐定定睇一場完整嘅比賽,Twitter呢個時候就發揮一個好好嘅作用,因為我可以選擇接受相關賽事帳戶嘅通知,令到我喺工作期間亦都可以猶如置身現場一樣感受到比賽氣氛同埋即時嘅比數同情況;即使而家因為疫情關係,留喺屋企嘅時間多咗好多,坐定定欣賞一場完整嘅比賽亦都唔係問題,但係我反而無減少使用呢一個功能,而係更加多使用呢一種功能。因為可以有時間隨時接收最新資訊同埋唔同場外嘅周邊新聞,令到我對每一項嘅賽事認識比以前更加深入,亦都令到我更加鍾意每一項賽事,咁當然亦都令到我可以有機會喺度同大家講吓F1。

總結:因為,我選擇咗Twitter 

其實正如我一開頭咁講,我完全無諗過同一個社交網站竟然可以使用超過10年,而且我係想繼續用落去。我諗我用咗10年以上,係各方面我都覺得佢同Facebook係無得比,雖然無可否認,有好多功能Facebook係絕對優勢,但係對我來講,Twitter上面一個follow制撳落去,相比起Facebook傳送朋友邀請之後仲要等人哋回覆,Twitter絕對係一種優勢,而且我亦都唔使等人地批准就可以睇到人哋嘅內容。雖然Twitter好似毫無私隱可言,但係而家呢一個資訊爆炸嘅年代,Twitter 嘅泛用性絕對比Facebook高,而且傳播速度亦都比Facebook嘅預算法更快,兼且我身邊好多朋友都係喺Twitter上面聯絡,更甚嘅係我可以透過朋友唔同嘅推文或者轉推認識更多人同埋了解更多唔同嘅事,所以,我選擇咗Twitter 而唔係Facebook。

再次大家衷心感謝睇完一篇廢文,今次轉咗文章嘅形式,算係一種新嘗試?亦都好多謝你睇到呢度,希望臨走之前可以慷慨解囊拍五下手支持我。咁過兩日就係情人節,加埋同埋最近好似無乜講過動畫,好似就嚟比其他類型嘅文章淹沒我原本嘅初心,咁不如就趁情人節,同大家重溫一套近年少見嘅純愛作品,不過前提就梗係要我講得切寫出嚟,而家嘅進度係0%,希望我個肝唔好咁快示威罷工啦。如果趕唔切嘅就下星期六再見,じゃあまた明日?

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论