潮乜春
潮乜春

一個喜歡創作嘅宅人,希望可以用宅人眼光出發,講解日常的生活的大小事? 唔理係動漫、F1、科技、定係生活上芝麻綠豆嘅小事,星期六準時0000更新~

不是每個人也適合的水手服ー《明日ちゃんのセーラー服》

校園作品相信大家都成日睇到,但係如果專注係服飾上面嘅校園作品大家又有無睇過?不如就趁呢個機會,同大家介紹一套一個女生穿水手服返學嘅故事。

同上一套我介紹嘅《着せ恋》,雖然都係 CloverWorks 嘅出品,甚至乎都係 2022年1月新番,但係兩套嘅作畫風格完全截然不同。如果話上次介紹嘅《着せ恋》專注係男女愛情同Cosplay方面,咁今次呢一套《明日同學的水手服(明日ちゃんのセーラー服)》絕對係另外一個層次。

故事係講述明日小路(本套動畫女主角),生活係一個鄉下地方。因為少子化問題,佢讀嘅小學得返佢同佢妹妹兩個人。佢由細到大都好憧憬穿着水手服嘅藝人福元幹,而且發現同佢媽媽就讀嘅中學都係同一間:私立蠟梅學園中學部。所以佢就用盡心機去考呢一間私立中學。而動畫開始時亦都表達了明日小路順利考到私立蠟梅學園中學部,而佢媽媽亦都為佢親手製作水手服。但係去到開學禮當天,先至發現原來好耐之前已經改回穿普通校服,唔再係指定水手服作為校服,但係經過同校方商討之後,明日小路成為全校唯一一個穿着水手服返學嘅人。而之後亦都因為佢與別不同嘅校服,展開了一段不平凡的校園生活。

同校方商討中

故事呢就大約係咁啦。不過係繼續講之前,請容許我講一樣野先。就係呢一套動畫,相比起任何一套作品,呢一套絕對唔係適合每一個人,甚至乎我可以話係適合一班有特殊癖好嘅人士觀看。因為相比起任何一套校園作品,成套作品注重嘅係水手服描寫同埋點樣透過水手服令到佢同唔同嘅同學有交流。水手服彷彿成為咗成套作品嘅重點,加上每一集內容主要都係在校園入邊發生,製作組彷彿好似知道觀眾想要咩,所以除咗水手服之外,每一集都畫到隻腳好靚。所以我先至會話,相比起其他任何一套作品,呢一套嘅觀眾客群其實真係有少少特殊。

其實當初我睇原作漫畫嘅時候,係一種好熟悉嘅感覺,但係又諗起邊度見過。之後一睇維基百科,先至發現原來《明日同學的水手服》作者:博,就係我之前介紹過嘅《本田小狼與我》輕小說嘅插畫家,唔怪之得一睇落去有一種咁面善嘅感覺。最初係先接觸《本田小狼與我》嘅小說,然後見到呢一套動畫化先至去睇原作漫畫,之後再睇埋維基百科,忽然發現兩套雖然題材唔同,但係畫風亦都好接近。

相信會睇呢一套作品嘅人,絕大部份都係因為見到水手服呢三個字而被吸引。但係對於我黎講,其實真係無乜感覺,甚至乎當初有諗過應唔應該選擇追呢套。回想我自己中學六年生涯,每年夏季都總係見到全校女生清一色換上水手服,所以都已經睇到唔想睇,難聽啲咁講,甚至乎已經睇到生眼挑針,咁所以我就絕對唔係因為水手服而選擇睇嘅。相反我係比少人提及嘅PV吸引,始終CloverWorks 一直都係有保障嘅製作公司,絕對唔使太過擔心畫面崩壞等等影響觀感。

水手服 vs 校服

點解我之前咁強調話呢一套係比較適合一的特殊癖好嘅人觀賞?因為呢一套相比起隔離嘅《着せ恋》,甚至乎同季其他任何一套作品,佢嘅故事絕對係平庸,既沒有Cosplay 換衫呢啲場面,更加沒有特別引起話題嘅故事內容,只係好平庸乏味嘅校園生活。但係亦都因為咁樣,成套作品就以水手服作為主旨,透過明日小路,將好普通嘅校園生活,繪畫到有聲有色。其實係睇動畫嘅時候,我自己都不期然想起以前中學時代嘅生活,雖然我中學時代稱唔上快樂,但係果種好似明日小路咁鍾意做乜就做乜嘅生活,我相信成為了大人嘅我地都只係可以回想。

係最後一集動畫播放嘅時候,明日小路用大約15分鐘嘅舞蹈向觀眾講述體育祭所有比賽嘅經過,其實成段舞蹈真係好靚,當然亦都正如我之前咁講,呢一個部份都唔知用咗幾多錢製作。但係,好睇睇好睇,但係側邊負責演奏嘅木崎江利花(明日小路在學校第一個認識的朋友)又彈琴又拉小提琴,相信最後一集播放時間又接近四月,令到好多人即刻覺得製作組係向《四月是你的謊言》致敬。雖然官方就無講係唔係咁做,但係好多人都覺得,呢一種表達方式絕對係好完美嘅表演。

一流的演出

另外一個令好多人垢病嘅就係,在每一集最少都總會有一、兩個畫面係採用定格方式顯示,雖然無可否認係畫得好靚,完全可以凸顯到明日小路穿着水手服的美態,相比起純粹採用動態畫面,色彩和線條可以更加令人印象深刻,而且更加可以突顯博先生嘅功力;但係都正正係呢一點,令到好多人都唔係太喜歡。雖然佢都係用之前我有介紹過嘅《本田小狼與我》中畫面轉接嘅方式呈現,但係今次實際上效果就好兩極。之前《本田小狼與我》由暗淡顏色轉到色彩鮮艷嘅情況,是想帶出小熊如何改變人生;但《明日同學的水手服》彷彿就只係突顯自己的畫工有多厲害,不是有特別的作用,所以亦都令到很多人不太喜歡。而我個人都唔係咁喜歡這一種風格,畢竟由細到大,係我記憶中真係未見過有一套作品係用呢一種方式呈現,雖然呢一種方法好創新,但係每當出現嘅時候總會唔得特別突兀,感覺和當下的氣氛完全不太配合,所以我個人覺得用呢一種顯示方式有一點畫蛇添足的感覺。

除此之外,另一個令好多人覺得遺憾嘅係竟然動畫去到運動會就完結,竟然沒有東京暑假篇。係開播之前,我當然亦都有走去睇原作漫畫,亦都同好多人當初期待嘅一樣,以為運動會篇章漫畫只佔很少部份,相反暑假去東京旅行篇幅很多,以為動畫也是一樣,只是輕輕帶過,然後以東京之旅作為收尾。正如上面咁講,雖然佢用舞蹈表達出運動會呢種方式真係好好睇,但係總係感覺有少少遺憾,因為睇唔到明日小路着住水手服遊覽東京嘅情況。當然啦,私心除了是想欣賞水手服之外,更加想睇在博先生同製作組嘅加持之下,究竟可以將東京畫到如何美輪美奐。不過只可惜製作組選擇用一個比較偏慢嘅方式講述整個故事,令到整套動畫去到體育祭便完結。話雖如此,雖然係遺憾,但係因為製作組採用一種比較慢嘅風格,令到唔同人之間嘅人物描寫顯得特別細膩,除咗令到睇動畫嘅人更加容易了解唔同角色嘅特性之外,亦都可以令到我呢啲有睇過原作嘅人可以更加清楚唔同人之間嘅關係,因為原創漫畫唔太深入寫每個人嘅特性,所以都算係因禍得福?又或者呢個真係留返比二期嘅伏筆呢,我相信呢一個咁好嘅作品應該會有二期嘅……

其實呢套可以評論嘅地方真係唔多,因為如果撇除水手服呢個元素,只係一個好普通嘅女校校園故事。但係正如我一開頭咁講,正正因為水手服這種咁習以為常嘅服裝,令到呢一套作品躍升成為一套與別不同嘅作品。當然呢一套《明日同學的水手服》並唔係適合每一個人,不過呢一種咁特別題材類型嘅作品,我相信前無古人後無來者,如果真係有時間嘅,不妨睇下可以將一套水手服畫到如何美輪美奐呈現係各位眼前。今日就講住咁多先,星期六再見。

好可愛Www


CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…
加载中…

发布评论