角醒
角醒

<角醒>是由大角咀街坊自發成立的社區報,由2020年起,每2個月發行一次。在大時代洪流下,我們選擇從小處出發,在角落處點一盞燈。 如果你有興趣加入製作團體,請填妥以下資料,我們將於稍後聯絡你: https://forms.gle/Cp78YdYSs71bn4zu6 如果你是大角咀商戶,歡迎加入成為派發點: https://forms.gle/ZWCmSUYqwhEYiPR19

41年老字號涷肉店

二代辭職回家接手經營 盼延續老父心血

1979年,老闆泉叔在大角咀嘉善街開設販賣凍肉的街檔,經歷過臨時街市時期,終在2005年搬進大角咀市政大廈街市,擁有一間較為穩定的店鋪。這間在區內經營41年,近乎無人不曉的老店,名為榮發凍肉。

舖內掛起寫有「榮發 SINCE 1979」的螢光招牌,四處放有聖誕飾物,雪櫃裏擺放著氣炸食品,驟眼看根本不像一間已開業數十年的傳統老字號。泉叔說,這都是年輕一代的功勞。原來他兩個兒子與媳婦因不想年紀老邁的父母繼續勞碌工作,便在近年相繼回來打點這盤家族生意。對於辛苦經營半生的心血得以承傳,泉叔也難掩內心的高興,「我就最開心係兩個仔返嚟幫手,繼續將間舖承傳比下一代。我都準備退休,孭個背囊周圍行下,唔再落舖頭㗎啦。」

兒子媳婦接手家族生意 主張新舊共融 

泉叔二子在四年前開始逐漸接手生意,太太眼見店鋪人手不足的情況漸趨嚴重,便在半年前毅然決定離去原有marketing(市場推廣)職位,加入成為凍肉店的一份子。「喺街市做係一份好有挑戰性嘅工作,我唔會覺得份工好污糟、好辛苦,其實邊份工都係辛苦、大壓力㗎啦。最主要係想老人家可以休息下,同埋想為屋企share(分擔)下, 睇下我嘅知識同經驗係咪幫到鋪頭。」潘太斬釘截鐵地說。

她也很高興老爺奶奶願意接受創新的意見,讓凍肉店傳承中新舊得以融合,「要同上一輩磨合、要佢哋了解我哋諗法嘅時候,有時候可能未必一推就推到啲嘢出嚟,就要做多啲解說,對兩代人都係一個成長。」除了舖面裝修,店內的貨品種類也增加了不少。另外,潘太更開設了Instagram帳戶介紹不同品種的凍肉予街坊,至今已有約五千人追蹤。

泉叔一家

老闆泉叔:大角咀街坊好有人情味

「唔怕辛苦,唔怕工時長,最重要係要有個恆心、有個決心、有個信念。」泉叔向記者分享他多年的經營之道,更提到凍肉店接近年終無休,自己41年來都沒有好好放假休息。他又大讚兩名兒子與媳婦用心工作,「佢哋都好聽話,你知啦而家做乜嘢都係手停口停,佢哋每日做咁多個鐘都冇怨言,默默耕耘。」

說到退休,泉叔最不捨老街坊多年來的支持與光顧。他表示從內地偷渡來港後,因沒有學識、但不怕辛苦,便開始作凍肉買賣,一直沒有離開過大角咀區,「大角咀街坊好有人情味,朝早見到我哋都會打招呼。我哋做得耐,基本上成個街市好多人都識嘅,有啲細細個得幾歲跟啊媽嚟買餸,到而家結埋婚仲會返嚟幫襯。」

老店無懼投訴 敢於表態  

儘管食環署轄下街市有很多製肘,他們仍然選擇以凍肉店的名義就反送中事件表態。潘太指,始終店舖在街市內的一舉一動也會被監控,針對他們的無謂投訴自然會增加,「但我覺得咁樣都唔會影響到我哋嘅信念,唔啱嘅嘢就係唔啱,係咪真係有人比人打死你都唔出聲呢?我諗每一個鍾意香港嘅人都會咁做。」

潘太表示自己同樣作為消費者,明白不喜歡就不會光顧這道理,「會唔會同街坊有拗撬嗰啲都無得擔心咁多。」她續指,除了政治立場外,他們還會確保食品的質素、貨品價格是否公道,「我相信只要做好自己,一定會有人欣賞。」

關心食品的質素、貨品價格是否公道,也是榮發經營之道

記者:James


CC BY-NC-ND 2.0

Like my work?
Don't forget to support or like, so I know you are with me..

Loading...

Want to read more ?

Login with one click and join the most diverse creator community.