AlexKCC

crypto, outdoor, nature, books.

《教育不只一條路》讀後感

「學習可以獨自躲在家𥚃學,但教育就是一個人對另一個人的影響。」 - 林茵

一本如果你都講過或認為「香港教育制度係廢嘅」,你就應該要睇嘅書。
係咪所有學校突然唔再考試為本就可以改革一切?
大學唔睇公開試成績嘅話可以睇咩?定係根本唔需要入大學?
入ive asos有問題咩?但所謂ive asos都入唔到嘅話可以點?
有冇諗過讀上去為咗啲咩?教育就係為學生揾份工?

香港記者林茵由二零一五年一月開始,用兩年實地考察同採訪二零零六年開校嘅香港兆基創意書院嘅老師、學生以及唔同經歷嘅畢業生,記錄依段追尋理想嘅過程裏遇到嘅困難、挫折以及從中得到嘅體會與成長。

當初政府立意向學生和社會提供多元化教育,「求學不是求分數」嗰排,揾有心之士開咗十一間「非主流」高中,幸存三間,其一就係香港兆基創意書院。個人認為本書唔只得教育,佢係一本關於面對挑戰點點滴滴嘅書,由其係制度。

第一年一班好有理想好有名嘅藝術家諗好哂課程希望可以教育到對藝術好有興趣嘅學生,點知嚟到嘅八成人都只係主流學校唔想要甚至乎連a至z、分數都可能唔識嘅band3學生,得返一至兩成係真心想讀藝術,喺名校轉過嚟學生嘅都有。當一班學生資質根基期望學習動機都差別大到咁嘅時候,班教開大學或大人嘅老師完全無所適從。

可惜挑戰唔只係來自學生,再難嘅係校長同老師自己大方向都唔想用懲罰同威嚴管理學生,總之要當佢哋成人咁尊重完全唔想要校規,到開校前覺得有十條打個底點都要嘅。問題慢慢浮上面,每位老師執行力度手法唔同,有啲又畀上堂食嘢有啲又唔畀;話唔畀染髮但唔誇張又隻眼開隻眼閉;叫做可以自己襯少少嘅校服啲人又開始試底線;本來遲到廿次踢出校,但有啲太手鬆到五十次都冇事,搞到跟足規矩嘅老師好難做。

轉個鏡頭,學生知老師有料有心想學嘢嘅又畀其他冇心嘅學生阻住上堂、老師想挑起學生興趣自主學習試「薈藝」-用唔同嘅戲歌書畫切入返中英數,又畀啲啲學生話不如操返試卷跟返syllabus教、開「小牛棚」畀啲自由度你做自己有興趣做嘅project點知你話乜都無興趣、冇學業同語文基礎唔好話喺現今社會做乜都難,根本連去理解,去欣賞人類文明嘅果實都做唔到。

第一次老師開咗公投「應否畫枱」畀到學生一課公民教育同體驗;之後學生為咗染髮而行出嚟反對唔覺意成立「無花果」同學校嘅辯論最後打破咗條唔染得髮嘅校規,好似好成功,但當時人已經感覺到面對一班「冇所謂」嘅人感覺有幾灰心;到之後嘅「遲到踢出校公投」投票制度嘅改變唔只令學生,仲令老師自己反思設立制度可以點維護當權嘅:「無花果」由當初有目的理想肯去付出嘅人傳傳下最後青黃不接;類似學生會但有實權嘅Student Voice亦都好似現代所見嘅議會咁傾嚟傾去都得個桔,總有人唔理或者反對而前路茫茫。

之後「小牛棚」因現實而消失,其實睇落去嗰幾位老師做嘅根本就係再生父母 ,由初期真係有啲有能力自學嘅潛質學生去到後期已經變咗要老師重新照顧冇自理能力有家庭創傷嘅細路,嗰種度身訂造教育嘅意義完全係唔可以用考試數字嚟定義。可悲嘅其實學校冇做錯,定位既然係藝術學校就唔用咁多資源喺SEN到分分鐘難搞過小學生嘅高中生。但同時又因為要生存而收多好多其實唔中意藝術只係其他學校完全唔收嘅細路入去。

睇到嘅唔只係書院嘅教育理念同實踐嘅掙扎,而係唔同理念團體嘅影子。除咗蛇齋餅糭之外,相信大部分團體都係為咗自己嘅初心成立(咁其實齋餅糭都有理念嘅),當中會經歷到嘅完全可以將書院唔同部分嘅經歷套入去,上面對下面信任度高又畀人覺得無為而治、中層有自由嘅無所適從、下面無能力自理自治又唔想負責任嘅stakeholders同大眾、組織開始多人令以前可以彈性解決嘅問題變咗吓吓要靠制度,而有制度大家又開始官僚、係少咗係唔係都話你食人血饅頭嘅「同路人」。

投票選擇唔同其實大家都冇錯,open source嘅crypto可以Hard Fork,合作唔到就另立門戶好似ETH ETC咁,但所謂「現實」層面真係可以咁?學校分兩間?國家…我愛一国!就算叮噹整張smart contract lock死啲政客跟選舉承諾會唔會又有其它問題?因為唔想人治而有制度,但人係執行嗰個,正如執法最公平嘅香港精英。

咁點嘅制度先係你心中目中嘅好制度?美國好似制衡得相對平衡但去到49%51%依啲關鍵位真係咁易共和?都唔好話印銀錢嗰個其實最大權。如果制度一定唔完美,我哋身為一份子可以點,應該點。

返返去本書,成本就係一份超深入超立體嘅報道,專業記者寫所以睇得好舒服,唔嬌情但描寫到人物嘅掙扎,睇住一句接一句就好似睇住十年樹木慢慢長高咁。唔同舊生嘅回憶會令到你反思教育係啲咩:最後嗰篇信,前校監去舊畢業生嘅婚禮開心嘅唔係因為佢哋飛黃騰達或者藝術造詣非凡過人,而係見到佢哋成為各行各業「善良嘅人」。

謝謝 @peterpanthepresent 借出書籍

#教育不止一條路
ISBN: 978-988-78061-0-3
作者: #林茵
編:陳曉蕾
出版:#繼續報道

#教育 #education #教育制度 #學習 #自主學習 #制度 #民主社會 #社會 #公投 #學校 #自理#自治 #讀後感 #圖文並茂 #書 #書中自有黃金屋 #書中自有顏如欲玉 #閲讀報告 #books #書籍介紹 #閲讀 #閲讀筆記 #講讀

Like my work??
Don't forget to support or like, so I know you are with me..

CC BY-NC-ND 2.0

言起教育 - 香港教育

教育

從名媛教育(An Education),反思教育

1

Want to read more ?

Login with one click and join the most diverse creator community.