犢爸
犢爸

分身Acc,唔創作,紀錄真實心情同諗法。

孩子的純真與父親節的喜悅

本文分享了作者感受到孩子的純真與善良,以及在父親節收到孩子們送的禮物時的欣喜。作者意識到要看到孩子行為背後的愛,並學到了寶貴的一課。

成個禮拜都好忙,搞到完全冇心機寫野,正身唔賺like,分身又唔做紀錄。所以其實我都幾佩服果啲可以穩定日日出文既user。

話咁快,個囝俾人打果單野已經一個禮拜。件事既後續我諗真係好小朋友,阿囝第日放學後繼續話要去同一個遊樂場度玩,然後又見返打佢果個細路。然後⋯⋯佢地就一齊玩⋯⋯老婆話佢都有問個囝,係咪有啲咩琴晚話要同對方講,然後阿囝先如夢初醒咁「係喎」,跟住走過去急口令式咁講完,就一齊玩⋯⋯原來「原諒」可以係咁簡單⋯⋯

然後去到星期尾,有好需要記低既野,就係我係阿囝手上收到三份父親節禮物。圖就唔貼啦(正身post過liker social,廢事直接自爆,不過都形容下),一份係佢係幼稚園度畫既畫,一份係佢係教會度做既手工獎牌,一份係佢同阿妹同老婆夾錢買既全家幅puzzle。每一件收到既時候其實都好開心,仔細一啲形容,我諗個種感受係被重視同埋被肯定。上星期先感慨同個囝相處時間唔多,之後父親節就直接收到回應,時間上真係好巧妙。

跟住今星期(前晚)老婆又同我分享阿囝既搞笑野,佢無啦啦去佢既錢袋度,拎左張五百蚊仲有另一張大面額紙幣,就俾我老婆,話「你拎去買你想買既野或者野食啦⋯」我即刻回應老婆,其實再早兩晚,佢都拎左七十蚊話要俾我,但我拒絕左。結果當然係俾老婆提醒,我應該要睇見個囝既行為背後果份愛,隨便拒絕可能會令佢覺得受傷同不被接納。又上左寶貴既一課⋯

結果我地果晚就上網睇下點用阿囝送既錢,去買返啲咩阿囝一路好想要,但我話「太貴,冇錢買」既野俾返佢。前晚睇,琴日買,返到屋企拎俾佢時,佢果個驚喜樣真係好正⋯

然後「諗太多」既我竟然係度諗緊,點樣同佢講「羊毛出自羊身上」既道理⋯⋯唉,呢個阿爸⋯冇得救⋯


CC BY-NC-ND 4.0

Like my work?
Don't forget to support or like, so I know you are with me..

was the first to support this article
Loading...

Comment