犢爸
犢爸

分身Acc,唔創作,紀錄真實心情同諗法。

氣炸鍋CP炸雞引發連番健康問題

作者分享了他們家庭因為吃氣炸鍋煮的CP炸雞後,接連遭遇喉嚨痛、中耳炎和疑似甲型流感的經歷。這段過程中,孩子展現出對他人的關懷與同理心,令作者感到驚喜。

三星期前既星期五,阿囝生日,佢話想食麥樂雞。同老婆商量後決定買包CP炸雞返黎,自己用氣炸鍋整好似多啲平啲又好味啲。我自己因為腸胃炎無福消受,望住老婆同阿囝食,口水直流。結果,佢兩個當晚個喉嚨就開始有野燒咁,老婆有經驗,沖包清熱酷再灌大量水入去及時阻止進一步燃燒。但個囝就唔好彩,佢去到喉嚨最痛佢最頂唔順既時候,先同我地講。當時已經半夜,佢聲都變埋,喊曬咁,第一次話「我真係好後悔食咗炸雞」。真陰公。

之後既發展當然開始有咳有痰有鼻水,如是者睇醫生食藥病足一個星期。到了星期五的凌晨,我一如以往咁Me Time到一點左右,先動手去洗埋啲碗、搞埋啲家務,諗住做完就去訓,第二朝六點半起身返工。點知做緊既時候,阿囝突然爆喊,話耳仔好痛,仲痛到訓唔到。結果,束手無策之下惟有去醫院睇急症。

我的籌號係4193😫

凌晨三點去到,結果等到朝早九點幾先有得睇。醫生check左半分鐘都冇,就斷症係中耳炎,會俾啲抗生素同止痛藥我哋。最頂癮係佢補充:「呢個病好簡單,食左藥,痛三日左右就會好。如果有concern唔想食抗生素,都可以唔食既,就痛耐多少少囉。」唉,都多謝醫生既,至少知係咩事,但同時都有種竟然為呢樣野白白坐係度通宵等六個鐘,有啲傻仔。

呢六個鐘其實真係唔易捱,因為阿囝已經好眼訓,但佢又一心認為好快有醫生睇,睇完可以返屋企訓。所以佢一方面好攰,另一方面又唔肯訓。Keep完係我大脾上反來覆去,每隔幾分鐘就問點解仲未有得睇,問幾時可以返屋企,或者發脾氣係度大叫。大概去到清晨六點,我既耐性都到極限,想搵護士問下宜家係咩情況。就抱起個囝,離開等候區,向住急症室其他區域,行一個圈。結果,我一個醫生都見唔到,成個場得兩三個護士係度左忙右忙,我就惟有走返去等候區度。神奇既係,跟住阿囝就肯訓覺了⋯⋯

睇完曬醫生返屋企路上,我有訪問佢「點解後尾你會肯訓覺既?」我都驚訝佢既回答,佢話:「之前唔肯訓係我好嬲,點解咁耐都冇醫生睇。但後尾係急症室兜左個圈,見到有好多人訓左係床度,好多伯伯,有受傷既人要俾人由一張床搬去另一張床,我覺得佢地比起我更加需要睇左醫生先,所以我就去訓覺慢慢等。」我真係冇認識過阿囝好warm好有憐憫既呢一面。

接著又係吃藥,又過左一星期,又到了星期五。臨放工突然收到message,阿囝發高燒,仲燒到上40度。返到屋企佢宜家縮左係張被入面,吸取上星期的經驗,佢訓到既話就捱到第二朝先同佢睇醫生。今次醫生話耳仔已經冇事,應該就唔係再惡化,但有可能中左甲型流感。然後就開左七彩顏色既藥水俾我地。

估唔到氣炸鍋整既CP炸雞,可以將個免疫系統弱化得咁勁。一浪接一浪咁,三個星期無縫接軌咁病。唉,大家都辛苦⋯⋯

CC BY-NC-ND 4.0

Like my work?
Don't forget to support or like, so I know you are with me..

was the first to support this article
Loading...

Comment