DuncanLau

岀生及成長於香港,旅居加拿大25年後回流。兩地生活文化的差異與衝擊,一邊是多元文化,一邊是中西匯集,從一邊看過去另一邊,算是多重國際視野。

有咁仆街得咁仆街

香港而家有幾仆街?香港人一定啞口無言(其實係敢怒而不敢言)!

在教協和民陣相繼宣布解散之後,仍有媒體窮追不捨,而公安亦揚言會仔細檢視證據,如發現有違法行為,將會有行動。(有冇違法始終講證據,即使佢話有就有!)但馬上有民間團體到公安總部外集會,要求郭安處盡快拘捕教協前會長馮偉華和前副會長葉建源, 並促請盡快涷結有關户口。而公安亦配合派人接信及拍照,你話今日香港有幾仆街!成日掛在口邊要維護乜嘢法治,但隨便一個二打六可以公開要求公安拘捕個別人士,呢啲算係乜嘢法治精神?如果呢啲人係事件受害者,認為呢件係刑事案件,大可以直接報案,交代清楚事件的來龍去脈,呈交人證物證,而公安亦會根據提交的資料而決定是否需要行動,即係有冇Case。如果呢個報案人根本冇直接受任何損失,其實冇Case,咁算係浪費公安力,可以比人告番轉頭。

香港前景

而家佢哋唔係報案,只係請願,要求拘捕某一兩個人,呢啲係乜嘢概念?如果人人都日日去咁樣請願法,你要求拘捕,佢要求涷結資產,咁會變成乜嘢世界?而且最離譜係佢地只會偏幫一邊,如果有人請願要求拘捕白衣人,(其實都公開要求咗好耐),你估有乜嘢唔同嘅後果?攪成咁,重講乜鬼法治!能夠破壞法治制度嘅,從來都係執法的人,當權者,由選擇性執法開始。

冇幾耐之前,公安又宣布,自從推出郭安舉報(篤灰)熱線以來,運作半年,已一共收到超過十萬個訊息!真係嚇親人!但係又冇進一步提供資料,有幾多跟進並作實嘅個案,有幾多成功檢控,咁空泛,即係點?而且佢容許匿名舉報,又電話,又電郵,又微信WhatsApp等等,有幾多喺重複,又有幾多係無憑無據,好明顯水份極高。如果當日元朗恐襲之後,公安話收到二萬幾個九九九電話係有人濫用,咁呢十萬個數字,點解唔係?

運動期間,很多人提出「攬炒」這個說法,一般平民百姓,任你點努力,做盡你能力範圍內可以做的事情,其實都炒唔到乜嘢出嚟。好似全體泛民已完辭職,成半咁滯喎,喺咪癱瘓議會呢?但佢哋已經改咗法定開會人數係二十人,所以會照開,議案照過,佢哋重話冇晒反對聲音,開會效率高咗,官員又唔駛比人質詢,大家耳根清靜,議案通過咗都無人知點解過咗,完全無痛操作,直頭樂此不疲。而一般市民見到呢啲冇料扮代表的尊貴已完,都冇聲出啦。

而睇番「攬炒」所提議嘅步驟,正所謂一隻手拍唔響,英文講嘅It takes two to tango,喺要另一方嚟配合,而呢一方喺有權有勢有法,佢每一步都可以舉足輕重,如果佢重有少少Common Sense,唔好做到咁盡,咁最多好似星加玻咁,獨裁得嚟又未至於完全獨行獨斷,適當時候又順應吓民意,勉強都唔會咁容易「攬炒」。但而家差不多日日都有新攪作,攪完一個就攪第二個,直頭要趕盡殺絕,突然提出嘅「完善」電影監管條例就係最好嘅示範,佢只係將生殺大權比咗官員,只要佢哋覺得係就係,可以禁映,但佢哋冇講明點樣至算係「危害」國家安全,亦冇指引,只係話比大家知,而家有條咁嘅條例,大家小心!而且佢重可以好口響話,冇干涉創作自由,乜嘢題材都重可以拍,冇限制。到你拍好咗預備上映嘅時候,佢哋有權(而且不用俾理由,佢話有問題就有問題)隨時叫停,以及相關行動。

咁嘅情況下,香港電影可以點?重邊有投資者願意揼錢出嚟,隨時血本無歸?你還需要問,香港今日有幾仆街?

Like my work??
Don't forget to support or like, so I know you are with me..

CC BY-NC-ND 2.0
2

Want to read more ?

Login with one click and join the most diverse creator community.