根叔|gunshock
根叔|gunshock

⎡邊緣回望後,滑進一界混沌,從不掙扎。跟自己的過去過不去,執著地浮沉著。⎦ Still hope/to hand stitch my book/of ups & downs on a tightrope./No plan to elope/coz it just chokes.

當年今日|落閘,放狗

點解有啲事喺發生之前,就實有預言家跳出嚟發表預兆偉論,然後有關當局就落定閘放定狗?而又有啲事情,就賊過再推兩推都唔肯興兵嘅?

在很多時候,廣東話能把人事形容得較貼地與傳神,也該更容易讓同鄉產生共鳴。

四年前的八月,港鐵對於香港市民的遊行訴求作出了「相當合適」的應對措施。下面是我能回憶起那天散亂的點與線。以白話來敍述,是因為開學前的這幾天恰好是體內懶蟲的驚蟄!在發文前我還是會過濾一下、修個幾遍,盡量減少加插無謂的個人情緒。當然我不必把自己鎖進偏袒/中立/沒立場的框框內。最重要的,是與其費時慢慢雕琢文字,不如去雕柒滿嘴義正辭嚴,實際上卻是在幫忙倒香港人米的人。雕完,如剛從減壓艙走出來,是說不出的舒暢淋漓。自我感覺良好,就此而已。我從不奢望能改變別人根深的念頭。

┏━━━━━━━━━━━━━━━━━━━━━━━━━━━━━━┓

 For most sane people, perception of world is rooted by the age of 25.
 We all make up our stories about reality.
 We resist interferences with a whole lot of different excuses.
 All that because we fear changes to our perception, even a minor twist.

┗━━━━━━━━━━━━━━━━━━━━━━━━━━━━━━┛

▍2019/0824

今日港鐵喺幾乎無預告嘅情況下,決定由中午開始嘅所有列車班次都唔停美孚站至調頸嶺站(下圖黄星記號),而九龍灣站至藍田站更加要落閘,華人與狗、老外與貓都唔畀出入。行動嘅原因話係為咗「審慎配合」

港鐵部分路線圖。圖擷自 https://www.mtr.com.hk。

"Thank you for your understanding.”

啥?個個英文字我都懂,㚒埋一齊嘅官腔語言就硬係唔撚明。唔解釋清楚,求其拋低一句,計我話直頭唔好行出嚟講吖嘛,嘥你嘥我時間。

┏━━━━━━━━━━━━━━━━━━━━━━━━━┓

 你都等我 understand 咗件事,先再出嚟 thank me 都未遲喇喂!

┗━━━━━━━━━━━━━━━━━━━━━━━━━┛

聽日咪又係大大力咁譴責遊行示威人士令進一步推香港去死。嗱,都幫你諗埋啦:

「示威者癱瘓九龍東 港鐵被迫停駛 商戶頻呼冤」
「暴徒衝擊港鐵 無辜職員被打鬧感受屈 淚滿面」
「市民促立刻停止暴力 免港經濟無止境下滑」
「⋯⋯」

哎唷喂呀,做大事唔好似足阿婆屙尿咁樣好冇,直接戒鹽吧啦,健康啲㖭。無車無人,清靜和諧零污染,大家又唔使無啦啦賞花杏仁露,咪幾好。

講到自己有幾咁配合警方行動,齋吹邊個唔曉?咦,咪住,次序應該係,有要求,先至會有後來嘅配合。即係港鐵公司以外嘅唔知邊位以組織或個人身分,曾經向港鐵發出過相關嘅要求啦?封晒啲大站,即係預計會有大規模衝突/暴動,即係好大機會發生傷亡事故?我堅係想了解一下用乜嘢準測嚟做呢個決定。

要市民同各行各業一齊配合,但係畀得一個鐘頭嘅事前通知?一粒鐘極其量只得六十分鐘,唔多夠時間畀所有返工返學買餸送信睇病嘅市民做準備。再者,要為配合而準備啲乜嘢呀?一九九九。

┏━━━━━━━━━━━━━━━━━━━━┓

 元朗警局去元朗市中心,閒閒地都半粒鐘啦係咪先。

┗━━━━━━━━━━━━━━━━━━━━┛

如果無人刻意造亂,遊行最終係和平地完結的話,今日呢個特別安排影響到嘅市民同商戶,係咪可以向邊個單位索償?

點解有啲事喺發生之前,就實有預言家跳出嚟發表預兆偉論,然後有關當局就落定閘放定狗?而又有啲事情,就賊過再推兩推都唔肯興兵嘅?

外國朋友話香港人嘅廣東話好艱深。我想同佢講,唔單止學習難,有時喺應用上,連 native speaker 都未必捉摸到。

擷圖自網絡。香港港鐵為對市民遊行作出的相應措施。2019/8/24 。

CC BY-NC-ND 4.0

Like my work?
Don't forget to support or like, so I know you are with me..

was the first to support this article
Loading...

Comment