IF
IF

此 Matters 帳戶已停用,請勿加入。如有興趣閱讀我的文章,請前往: https://www.patreon.com/herrfung Medium 累積超過一百萬 claps 嘅廣東話作者。小說 《當首爾仍是叫漢城的那些年》系列、《北角演義》、《初雪》、《中環遊戲》作者。

中環遊戲(49)

請柬一出怎抵擋

如果你問我,喺男女關係嘅世界裏面,有乜嘢比造愛更有趣的話,我會答你:我同 Cindy 喺 Vegas 最後一日、同埋返香港嗰程機呢種曖昧關係。

做咗咁多年人、溝咗咁多女,喺床上面玩得嘅嘢(甚至唔玩得嘅嘢),真係冇乜未試過。無論講到點天花龍鳳都好,講到尾都係為咗嗰幾秒嘅高潮。當你釋放完蛋白質之後,你會發現,其實無論你點努力,你嘅高潮都唔會走得出嗰個框框同嗰幾秒(邊個同我講你有幾分鐘高潮嘅,麻煩你拍套片擺上 youtube 同大家分享吓)。耍咁大套拳,其實只不過係場興奮啲嘅帶氧運動。

但係呢種曖昧關係就唔同。似實還虛、似有還無;有餘韻、甚至有種初戀嘅感覺,而且仲唔係兩嘢玩完。最重要係:我哋冇做任何越軌嘅嘢,完全冇犯規,你就算慢鏡重播都吹唔到我越位。但係心靈上、感情上非常滿足,我相信 Cindy 都係。

不過,幾滿足幾興奮都好,到此為止喇。因為 trip 出完,我又要返回人間「阿修羅場」,繼續「阿鼻叫喚」。(認字特警們:「阿修羅場」我冇打多咗個阿字,原文係韓文嚟。)

喺傳統上,一個公關公司老闆喺一二月份有啲乜嘢要做呢?

答案:飲飲食食。因為,呢個係年夜飯/春茗嘅季節。各位,請清空身體內多餘嘅膽固醇、三酸甘油酯同脂肪,喪食月即將展開!

唔知會唔會有一日有數據,話俾大家知,一年有幾多中小企老闆食春茗食到中風呢?


星期三,落機翌日,返公司開會。

係時候睇吓公司嘅四個俏嬌娃喺我缺席嘅一個星期裏面,有冇甩皮甩骨之類嘅嘢發生。

「嗱,手信,三件女裝自己慢慢揀;」我將紙袋裏面嘅 A&F tee 拎出嚟俾 Winnie 以外嘅三個女人。「Danny 你唔使爭,呢件男裝係你嘅。」

Danny 係同 Charlotte 同期入嚟嘅男 AE,Queenie 嘅大學同學;特點係靜,可以一晝都唔出一句聲。好少咁靜嘅人會入呢行,我有啲替佢擔心;不過,佢做嘢手腳幾快,屬於少說話多做事嘅人,都算幫到手。

「多謝老細!」三女一男齊聲多謝我,然後三個女人開始揀 tee。

「咁老闆娘呢?」Charlotte 問 Winnie。「Winnie 你揀咗未?」

「著緊喇!」Winnie show off 佢身上嘅粉紅字 A&F hoodie。「好厚淨好暖㗎!」

「老闆梗係會特別照顧老闆娘啦!」Jessica 放暗箭。「又點會同我哋爭喎,多餘……」

「Jessie 呀,不如你要呢件吖!」Charlotte 還拖。「粉紅色啱你呀!鍾意 bilibala 嘅女仔一般都鍾意粉紅色㗎,哈哈!」

「我唔鍾意粉色㗎,我揀深藍色!」Jessica 嚟個還施彼身。「Charlotte 不如你要粉色呢件吖!大件啲冇咁貼身,收埋肚腩易收啲㗎!哈哈!」

呢兩條女兩句皮笑肉不笑「哈哈」虛晃嘅兩招,正好反映佢哋兩個嘅矛盾完全冇解決過不特止,仲好似越嚟越大鑊,或者朝住越嚟越大鑊呢個方向進發……

「係呢,我唔喺度呢個星期,你哋啲嘢搞成點?」我唔想睇佢哋兩個私片,於是轉話題。「有啲乜嘢要我特別留意?」

「JBC 個 mini launch 進度正常,今日應該 finalize 到份 MC script;」Jessica brief 我佢手上嘅客戶近況。「Rachel 姐今個星期日繼續街頭 CRM,model 用返上次嗰個,佢話老細鍾意。NTS invite 我哋去 bid 佢個十週年 event……」

「NTS?」我好奇。「好多明星名人去嗰間 SPA?」

「係呀,我舊同學 Yvonne 係佢哋嘅 PR manager;」Winnie 答我。「佢會負責個 bid,我哋呢邊就會交俾 Jessica 去跟。」

「咁睇你台戲喇!」我對 Jessica 講。

「收到!」佢似乎好有信心。

「Daehwa 嗰邊同你一齊去晒 Vegas,所以冇乜特別消息;」輪到 Chalotte。「今個星期應該會同 Patricia 傾佢哋嘅傳媒春茗。」

「Ok……」我睇一睇個 client list。「仲有冇乜嘢要我去留意?」

「有,你嘅膽固醇同 BMI!」Winnie 笑笑口遞咗一大疊類似請柬物體俾我。「呢堆全部都係你啲客同商會嘅春茗請柬,你看著辦啦 committee councilor!」

我係咁倚揭咗幾張嚟睇,有幾多呢?簡單講句:由呢個星期開始一直到三月中,我大約每星期有兩三餐春茗;二月再密啲,大約每星期三四餐。

「你可以揀吓邊啲去邊啲唔去嘅,」Winnie 見到我未食已經滯晒嘅樣後同我講。「裏面有post-it 嘅係商會有關嘅,Diana(商會秘書)話 Joseph 想你出席喎……」

我望一望,差唔多八成都有 post-it……

「我見到好多 post-it 喎……」我垂死掙扎。「去少幾個得唔得呀?」

Winnie 正想答我「唔得」之際,Jessica 加把嘴:「去食飯啫,都唔係乜嘢苦差吖!老細,頂硬上啦!」

「哦,好呀!」我喺堆請柬裏面求其潛烏龜咁潛咗幾張出嚟交俾佢。「本 councilor 決定委派你出席呢幾個春茗,你去飲飲食食就得喇。不過,每個春茗我都希望你交換廿張卡片返嚟,然後撮個短 report 俾我。」

三女一男聽完後 kit 一聲笑咗出嚟,係 Jessica 完全唔識俾反應。

飲飲食食吖嗱,就等你試吓乜嘢叫「背脊骨落」嘅滋味。


大家睇完上面嗰幾段,係咪有種感覺,覺得我好討厭去年夜飯春茗之類嘅 event?你哋冇感覺錯誤,我的確好討厭呢啲借食飯為名嘅商業應酬。

首先,亦都係最大嘅理由,就係我從來未試過喺有外人嘅場合食飯食得舒服。但凡有外人同檯食飯嘅用餐場合,我都唔會食得飽、亦唔 enjoy 嗰餐嘅味道。唔好問我點解,我老母生成我係咁,我都冇解釋。

然後,我唔知負責呢啲春茗嘅公關大員點安排,我每次去春茗,同檯食飯嘅人當中,唔知點解,總有一兩個口水多過海水嘅人。有時為咗應酬呢啲吹水怪,連夾餸都慢咗,搞到原本已經食得唔好嘅一餐,更加雪上加霜。

另外一樣我最怕嘅嘢,就係 chit chat。一個至數個互相無甚好感嘅人(有好感就同你 friend 咗好耐啦,大家都係呢個行頭嘅人),因為想盡快擺脫喺 event 嘅孤兒仔感覺而一齊圍爐、講埋啲不著邊際而又唔係真正關心嘅話題。如果你問我,有乜嘢比「屌你老母」更難聽,我會答你係春茗應酬講嗰句「你最近點呀?」。

老老實實,有撚人有興趣知你最近點咩!我琴晚生中出咗我老婆呀,使唔使同你分享過程呀最近點!

我之所以咁有火,係因為我而家正身處一個咁樣嘅場合、對住一班咁樣嘅人、做緊啲咁樣嘅嘢。咁樣蹉跎歲月,想唔好火都難……

還好,手機嘅震動救咗我一命。我扮有緊要嘅 message、講低句「失陪」就搵個暗角閃咗去。

「今日返工,再冇你喺我身邊,感覺好失落……>_<」

係 Cindy 嘅 message。其實,佢係咪 flirt 緊我呢?如果唔係,點解我會有咁嘅感覺嘅?自從 Vegas trip 之後,我哋每日都會有幾個來往 message。我哋仍然緊守我哋應該緊守嘅底線、冇任何越位嘅 message;不過,感覺越嚟越唔同,越位陷阱嘅壓力越嚟越大……

「返工就專心工作,唔好亂諗嘢啦,首席行政秘書!」我係咁覆佢。

「我係都要亂諗呀,咁點吖!哥哥,我好掛住你呀……ㅠ ㅠ」佢好快就覆我。好明顯,佢放咗工好得閒。

當我正想覆佢嗰陣,有把熟悉嘅男人聲講咗句:「做咩對住部手機傻笑呀?同老婆玩緊 IM 呀?」

我抬頭一望,係 Joseph。

我諗我應該收斂一吓,唔好再喺公眾地方俾人見到我個發姣樣。

「點呀 Jo 哥!Jetlag 完未呀?」我同佢打招呼順便扯開話題。

「Lag 鳩完啦,我係咪啲作息時間都咁顛倒㗎啦!」佢答我。「你呢?點呀?處理掂你啲錯綜複雜嘅三角關係未呀?」

「三角關係……」還好我仲未開始飲酒,否則差啲俾佢呢啲聽者有意嘅語帶相關搞到鬼拍後尾枕,以為佢講緊我同 Cindy。「你講緊 Daehwa 啲揸𨋢人打崩頭爭紮職做老坐嘅嘢呀!未有耐擺得平啦,呢啲嘢仲有排玩呀!半年啦!」

「唔係講呢啲講邊啲喎……」佢笑笑口半自言自語咁答我。「係喎,有壇嘢想問吓你,你做咗咁多年記者應該會聽過:仲記唔記得好多年前,IT 記者圈入面,有『腦記春茗』呢回事?」

是咁的,喺 2001 同 02 年,一班有 heart 嘅 IT 記者,曾經舉辦過一個叫「腦記春茗」嘅 event,俾一班「腦記」同「腦公關」一年有一次聚頭嘅機會。我仲記得,02 年嘅腦記春茗,係由啱啱跳出嚟自立門戶嘅 Richard Ong 攬上身義務舉辦,仲搵咗好多贊助,搞得有聲有色。後來 03 年因為社會環境惡劣,「腦記春茗」經過兩屆後,成為絕響。

「記得,咁大件事點會唔記得!」我答佢。「我兩屆都有去,仲有中獎𠻹!」

「你知咁就好喇!」佢笑笑口拍拍我膊頭。「你而家再中多次獎:今年我哋商會諗住重新舉辦腦記春茗,呢個 project 我決定交俾你去搞!」

我發夢都冇諗過,自己有成為腦記春茗搞手嘅一日。當年 Richard Ong 主辦過腦記春茗之後,佢嘅 Soliloquize 喺腦記們心目中,成為咗最有力嘅 IT 公關公司。如今到我去做呢樣嘢的話,你好難阻止我去諗,我嘅 Infinity Communications,會唔會取代到 Soliloquize、成為最有份量嘅 IT 公關公司?

「有能力吹雞搵一大班腦記出嚟,呢間公關公司一定會喺行內響晒躲;」Joseph 講出我心裏面諗緊嘅嘢。「我哋除咗會請腦記之外,仲會請埋同行嘅其他腦公關、同埋一啲出名嘅 IT bloggers 同 Vloggers。一場兄弟,唔好話我唔俾張好牌你上喇!日後做咗 IT 公關界嘅 Voice of Opinion Leader,記得射住我呀!」

「屌,講埋晒呢啲衰嘢!」我謙虛幾句。如果有人幫我影相的話,我應該見到自己個「劉江 meme」表情。「VoOL 嘅嘢,幾時輪到我呢啲 small potato 喎……」

「使乜撚嘢咁謙吖!」佢都嚟嗰「講呢啲」表情。「我話你係就係啦!喂,講開又講,潘公子話有嘢搵你喎!」

潘公子,香港著名嘅紅色資本家潘某嘅孫,屬於「紅三代」。由於為人低調,所以唔係有好多人知佢呢個「身份」。佢亦係 IT 會嘅委員,打埋算盤同我都算係「同事」。

「我哋做嘅瓣數唔係好同喎……」我狐疑。「佢搵我做乜?」

「點 Q 知咁多喎,佢淨係同我講過,有嘢想同你傾吓,」Joseph 答我。「你有時間咪撥個輪同佢嗲兩句囉!」

一個紅三代搵我傾嘢?我開始有啲興趣想知佢究竟有乜同我傾……


星期五,又係時候停一停、唞一唞。雖然我今晚都仲有乜春茗要去……

「老細!」Jessica 滿臉堆歡咁敲我房門。「得唔得閒傾兩句?」

「入嚟啦!」我放低手上同 Cindy 嘅 texting(睇清楚係 t 唔係 s),叫佢入嚟。

「我買咗你最鍾意食嘅芒果乾嚟孝敬你呀!」佢放低包芒果乾,同埋一個 file。「呢份係我去完兩個春茗嘅 synopsis 呀,你睇吓有冇問題?!」

我望一望,佢將喺春茗收集到嘅卡片影印咗,然後寫上 comment 交俾我。

「無事不登三寶殿,做乜咁好死請我食嘢先?!」我明知佢想點,不過係都要佢開聲講。

「老細,sorry 呀,我以後唔敢喇!」佢求饒。「我可唔可以唔再去春茗呀?去咗兩餐我已經想死喇!個個都殭屍咁,個個都講埋嗰堆廢話!琴晚嗰餐呀,我仲撞到個痴漢呀!佢係咁想攞我電話,又問我咁咁咁咁…………」

「身教」永遠係最好嘅教育。以後公司仲有邊個話去春茗只不過係食免費飯的話,我會請佢去足一個星期,擔保佢連隔夜飯都嘔埋。

免費才是最貴呀!

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…
加载中…

发布评论