HeyMissWoW(she/her)
HeyMissWoW(she/her)

👩🏻‍🎤性治療師 👩🏻‍🎤社工 👩🏻‍🎤社工講師 👩🏻‍🎤性教育工作者 🌈LGBTQ+ Ally 🌈kink & 🦄poly friendly 是性也不是性 談性 談性/別 談人性 談人生

《無助的惡女子2022 年後記-女人愛自己》

(往後文章都會用廣東話寫,但因為我好多廣東話正字我都唔識,歡迎更正正字)

用2022年嘅我睇番2016年嘅我寫嘅嘢,有少少唔同左 。。。。。

做咗差唔多40年人, 40年女人,其實我一直都唔明白點解女人睇愛情睇得咁大

好記得有一次收到一個啲DM,一位女WoW Fd 經歷咗好痛苦嘅感情欺騙、自我安慰、關係拉鋸,最後「被」分手。

佢問左我一句:「究竟點樣先至係愛自己呀?我好想愛自己,但係我做唔到,好痛苦」

呢幾年喺學習性/別嘅過程裏面,我好似為呢個問題嘅答案探索到一點線索一點端倪

其實女性真係好難愛自己,因為我哋個社會建構一直以來都話俾女性聽我哋係為別人而存在,我地係透過別人去肯定我自己嘅價值。

我價值可以來自我嘅美貌,可以來自我嘅身材,可以來自我係咪一個入得廚房出得廳堂上得大床嘅好女人;我哋係要討好別人我哋先有好日子過。在職場上你要美麗要溫柔要圓滑要平和順從唔好太多意見唔好太過進取;喺關係裏面我哋都係需要去照顧另一半包括身體情感情慾同性都係要以佢為先。喺家庭系統更加唔洗講,自己原生家庭、結咗婚嘅亦都要顧及奶奶老爺丈夫嘅原生家庭、如果有埋小朋友嘅,小朋友都會自自然然係女性要去付出較多去照顧。因為大家認為女性就有「母性」,有「母性」就自然負責更多親職責任,所以女性就自然兼自動地去奉獻、為家庭犧牲。

女性嘅人生發展中,好多時候都係「冇自己」或「唔可以太有自己」(否則就係「任性」「唔聽話」「壞女孩」「唔檢點」)

而「究竟我點樣可以愛自己」呢個問題嘅難度係 :「首先要有自己,才有「自己」去愛,然後再學點單純地愛自己」

咁究竟點樣先係「有自己」? 呢個問題我都一直探索中。但有一點我覺得我自己都會提醒自己嘅係,如果我一路以嚟嘅行為其實都係被別人嘅期望所牽引,我做嘅嘢係為咗滿足他人或者社會對我期望嘅話,就算我做得幾咁輝煌嗰個都唔係真正嘅我,因為個框架係人哋幫我訂,我活出係他人期望中嘅我,哪個自己係屬於「他人」的。


至於自己個框架係點樣,我覺得呢樣嘢係真係需要時間去建立,因為我哋要去認知舊有框架,有勇氣去破除舊有框架,再有勇氣去話俾人聽我唔跟舊框架我有我自己嘅框架,並且予以實行。即使面對任何嘅批評嘅聲音,或者內心出現幾多恐懼嘅聲音,你都會堅信自己嘅信念繼續走落去。


自己(或「自我」)係一個好大嘅課題,可能窮一生我哋都學習緊

愛自己更加係大課題中嘅大課題。

所以,我好似有少少明白,「愛情」之所以咁重要,因為愛情可能被建構成女性肯定自己價值嘅場域,我哋喺愛情裏邊我哋感到被愛所以我哋知道自己係有價值,當冇咗愛情=無人愛我,無人愛我=我就係唔值得被愛嘅人,我唔值得愛所以我冇價值 

失戀嘅痛苦唔係單係關乎無咗愛情,痛苦嘅核心係我哋冇咗關於自我嘅價值。

回望2016年那位餐廳惡女子如果我代入佢,我相信表面憤怒之下,包含一堆情緒「無力感」「悲傷」「恐懼」「自我厭惡」,到今日我未必會提議甚麼方案俾佢點做 (因為我真係無資格)

我覺得需要肯定佢絕對有憤怒的權利,可能我會上前給她一個擁抱,輕輕同佢講:無論發生咩事,情況幾壞幾痛苦,請你要記住你係有價值的 

(隨心寫於 2/2022)

ALL RIGHTS RESERVED 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论