Michael Collins

香港心理專家• 新手Matter作家😉

八月闔家撐港片

唔知香港有幾多個家庭好似我哋咁撐今期港產片呢?

之前因為疫情無得入戲院,今個月一於動員全家撐港產片,仲差九月先上畫嘅《飯戲攻心》就任務完成!今日一於回顧當中五套先🤩

  1. 票房超過三千萬典型賀歲喜劇《闔家辣》:Edan同老豆中基同阿媽Gigi齊齊搞辣椒醬創業,過程都幾搞笑!中基講嘢用番佢「機動電視台」嘅口音,笑爆咀😆Gigi比佢做《反起跑線聯盟》自然得多;姨媽君如唔再做催淚阿媽,做個移民遺孤,笑中有涙!疫情多年,心情麻麻,睇吓笑片輕鬆吓😝
  2. 票房超過二千萬偶像劇情片《阿媽有咗第二個》:茶餐廳夥計姜濤、阿媽毛姐同埋仔仔阿Jer努力爭取心愛的人重視自己,十分感動😭導演彭秀慧講故事如泡茶淡淡清香,台灣片的節奏,將「花姐」的故事變奏!
  3. 票房超過千五萬懸疑警匪片《神探大戰》,經典電視劇《大時代》導演韋家輝搭劉青雲組合,一定少不了掉人落廟街的場面,阿Sa做咗「鐵甲奇女俠」,大住肚同生完仔都可以飛奔、跳海同開槍捉賊,至於林峯嘅Chok 樣唔多似變態佬!
  4. 票房超過六百萬小品愛情片《緣路山旮旯》導演黃浩然起用「怕醜但細心」的珈其同五個「急進」靚女走訪五個香港絕色美景(唔少要用禁區紙㗎),其實我屋企日落都好正,位置山旮旯,導演不訪考慮吓😆幾個演員在電視劇《IT狗》見過,既熟識又好fresh呀!
  5. 票房首日突破三百萬的首部香港科幻片《明日戰記》絕對是誠意之作!故事圍繞一次三小時的任務,清晰明確,節奏極之明快,加埋戲院特設的震動座位,真係好正!古仔同青雲兄弟班由頭打到尾,場景是我返工必經的觀塘繞道同東區走廊,特技場面無得輸,簡直向荷里活科幻電影(包括異形續集、侏羅紀公園、變形金剛、鐵甲奇俠等) 致敬!

唔知香港有幾多個家庭好似我哋咁撐今期港產片呢?

Like my work??
Don't forget to support or like, so I know you are with me..

ALL RIGHTS RESERVED

Want to read more ?

Login with one click and join the most diverse creator community.