KITTY

在香港長大的女生。喜愛小朋友,現每天和幼兒及家長打交道。喜愛日本文化,曾到東京過打工仔的生活。

家事法小知識(2) — 離婚一定要搵律師?

[註:我在工作上有時遇到想離婚的夫婦,發現自己對香港家事法零認識,於是傻傻的走去進修。這裏紀錄了離婚夫婦常見的問題,結合自己平日遇到的個案,和大家分享。其實香港司法機構和律師樓網頁都有相關資訊,但我覺得用字深奧,又沒有個案例子闡述,所以這個系列的文章我會用廣東話書寫。]

問:離婚一定要搵律師嗎?

答:唔一定,但有啲情況搵律師或家事調解員幫手,雙方就容易啲處理離婚手續。

如果雙方同意離婚,對仔女和錢銀安排冇咩爭議,覺得填寫離婚表格(共同申請書)又冇咩難度,其實可以唔請律師,自己交表去家事法庭。有時我遇到基層嘅家長想離婚,雙方願意簽紙(即共同申請離婚),冇咩大爭議,但冇錢請律師,又唔係好識填表,我會直接同佢哋傾,或者轉介去綜合家庭服務中心,就有社工教佢哋離婚手續嘅程序,同埋點樣填嗰份表。

如果單方提出離婚,手續就麻煩好多,我建議最好花錢搵律師,或者家事調解員。因為你唔熟香港家事法嘅話,就要花時間處理各樣程序,例如:提出離婚嘅一方(法律上叫呈請人)係需要有理由證明婚姻已經破裂,假如你唔知法律上有咩理由證明,你就要自己搵資料去填份表格(離婚呈請書)。另外,雙方係仔女和錢銀安排有紛歧,就一定要搵專業人士幫手,律師可以幫你做好上庭嘅準備,維護你嘅利益,例如:仔女跟自己住同生活費嘅金額,而家事調解員就協助雙方係仔女和財務安排上達成共識。

可能你會問律師同家事調解員有咩分別?家事調解員嘅時薪比起律師平,主要係幫離婚夫婦傾好仔女同財務嘅安排,達成共識,然後草擬到一份協議書,交上家事法庭,咁雙方就唔駛上庭答辯咁多次,慳咗律師費又慳埋時間。律師同家事調解員嘅角色唔同,你可以同時請律師和調解員,或者只係請調解員都得。調解員嘅出現係想減少訴訟嘅成本(時間和金錢),你睇吓香港有幾多家事法庭法官,計埋暫委法官只得12位,要處理每年大概15000單婚姻訴訟(2019年數字,呢個數係冇計雙方同意嘅離婚個案),所以根本就唔夠法官處理咁多婚姻訴訟,所以係香港搞離婚手續要咁耐。

大家如果係婚姻上有問題,歡迎私信搵我傾談!(我唔係詛咒大家感情破裂,但遇上問題最好快啲溝通解決,否則成為雙方心裏嘅刺,就真係離婚嘅導火線。)

Like my work??
Don't forget to support or like, so I know you are with me..

CC BY-NC-ND 2.0

Want to read more ?

Login with one click and join the most diverse creator community.