慢活森谷

|酷愛與自然連結|亦是貓奴|居於巨變中的海濱城巿|讚賞公民

社區活動|我的格仔餅回憶:半底,唔該。

既然呢次社區活動嘅關鍵詞——格仔餅——係一個香港地道嘅叫法,呢篇文章我決定用廣東話嚟寫。

香港叫嘅格仔餅,書面語好似叫夾餅,而台灣又叫佢做鬆餅。細個一直以為格仔餅係自古以嚟香港人發明嘅地道美食,因為格仔餅同雞蛋仔,根本就係連體嬰,永遠都一齊响街邊出現。點知大個之後就發現,原來佢仲有另一個洋名,叫窩夫。睇番呢篇文章,似乎佢係比利時嘅來路野,因為香港物質貧乏,自古應該未食得起牛油煉奶花生醬住。

講起格仔餅同雞蛋仔係連體嬰,因為細個嘅時候,格仔餅都未登堂入室,莫講話入餐廳放响碟上面用刀义食,根本就唔會有一間舖頭(甚至叫專門店添)度賣,佢從來只係小販推車嘅走鬼檔小食(唉!出賣年齡系列!)。而個蛋漿就係一雞兩味,整雞蛋仔又係一殼,整格仔餅都係果一殼,只係倒入唔同嘅模具度啫。格仔餅會再搽上一層牛油,一層煉奶,一層花生醬,再灑上砂糖。細個無乜機會食甜野,自然鍾意食甜到漏,味道又豐富嘅格仔餅。大個咗先識得欣賞雞蛋仔嘅外脆內軟,同埋蛋香牛油香。

最記得小學放學嘅時候,間中會有個伯伯响對面馬路擺檔,果陣烘焙牛油嘅香味,真係會令你連巴士都睇唔到照樣匆過去,即刻同伯伯講話唔該要半底呀。係呀,無寫錯,半底。以前係用底做量詞嘅,唔知幾時開始,變咗做一份。同埋以前香港買野,好多都可以散賣,唔似宜家咁樣,永遠都要你買多尐平尐扺尐(收錢果個?)。雖然香港開始復興番一尐散賣食物嘅舖頭,但係佢哋唔再係平民雜貨舖嘅價錢,反而係賣格調同環保。

講番我果半底格仔餅。好多時企响度等伯伯整,已經係享受緊個過程:望住佢倒蛋漿,搖勻塊模具,用石油氣爐大火噴射。漏瀉出嚟要刮邊,再反轉佢烘多陣,個心真係急到想催伯伯快手尐。然後,睇住佢打開模具,用刀敲塊出晒煙嘅格仔餅出嚟,分開兩半。一手用個紙袋托住塊熱焫焫嘅格仔餅,再一手用刀刮入大大桶軟滑嘅牛油度,一抹,再用同一把刀抹一層花生醬,最慘就係要等煉奶慢慢响個嘜度流出嚟,响格仔餅上空打轉,然後灑上一湯匙白砂糖,對摺,入紙袋,禮成。
我快速遞上珍貴嘅零用錢,速速將塊餅褪番出嚟,唔理有幾焫嘴,一啖就食咗一個角落先,慢慢去感受當中的熱度,唔同醬料混合嘅香味甜味,仲有就係咬落白砂糖沙沙作響嘅質感。好簡單,又普通嘅材料,撈埋一齊就滋味無窮。通常我三抓兩撥就已經食晒。往往最後都會食到污糟邋遢,嘴又有,臉又有,手又有,分分鐘漏到連校服都有,返到屋企會比阿媽話。

雖然宜家用料講究又多變化,但係,細個時食格仔餅嘅開心回憶,係無可取代嘅。


輕輕拍手五下將會鼓勵我努力去發表更多的圖文!成為貓奴讚賞公民,贊助主子每月的罐罐,讓貓奴可以更專心創作!


Like my work??
Don't forget to support or like, so I know you are with me..

CC BY-NC-ND 2.0

【社區活動提案】我的格仔餅回憶

我的格仔餅回憶

格仔餅不是窩夫—我的格仔餅回憶

39

Want to read more ?

Login with one click and join the most diverse creator community.