慢活森谷
慢活森谷

|酷愛與自然連結|亦是貓奴|正在適應新的環境文化|讚賞公民

山水之約|被叢林吞噬嘅牧場 (廣東話)

輕輕鬆鬆嘅全日行程,包含咗村落,水務,牧場,戰爭遺址同埋生態欣賞,仲有瀑布同海岸風光。你叫我點樣不愛香港嘅一草一木,一磚一瓦呢?

禮拜六响充足嘅陽光底下,行過香港島最早期嘅村落薄扶林,搵吓唔見咗嘅牧場遺跡。食完野再去傳聞話同香港開埠有挐掕嘅瀑布灣睇吓

左:六年前巧遇整條火龍响度休養;右:如今就困响竹棚入面

薄扶林村舞火龍

由薄扶林村村口落車,就已經俾韞住响竹棚入面嘅龍頭吸引。港人可能以為只有大坑先至有舞火龍活動,其實薄扶林村嘅舞火龍都好有特色,因為衪最後會被送去瀑布灣落海,龍歸蒼海。薄扶林村舞火龍喺2017年列入咗《香港非物質文化遺產代表作名錄》。

左:馬塞克介紹;中,右:當年遇到嘅手繪地圖,路標。

保育薄鳧林村落

薄扶林,原本嘅寫法係「薄鳧林」,鳧係同野鴨好相以嘅雀,係指有好多野鴨住响呢一帶嘅叢林。港島區居然仲有一大片寮屋,背靠太平山,面向東博寮海峽,景緻宜人。對面就係南區老牌屋苑置富花園,沿住薄扶林道到西環都唔駛五分鐘車程,地理方便。就係咁,地產商梗係牛咁眼睺實佢。幾年前好彩有一班熱心嘅村民同香港大學建築系學生,整咗手繪地圖,又响村入面留低可愛嘅路標,開始保育這條古老村落

我早排就孖住同事响村入面亂行,响錯綜複雜嘅細巷仔度各個有趣嘅標誌。中途遇到幾位親切嘅村民,都會主動停低指路,甚至親自帶埋我哋行。雖然果時已經知道牧場遺址散落四周,可惜未夠料,所以最尾敗走西高山。

牛奶公司宿舍

响香港無人唔識牛奶公司,薄扶林牧場係香港第一個牧場,由蘇格蘭藉醫生文遜爵士响一百三十多年前創辦。由於牧場霸晒成個山谷,需要勁多人做野,令到薄扶林村落更加墟冚,可惜到咗七十年代,隨住置地買起牛奶公司,攞晒尐地嚟起樓咁滯,加埋後來畜牧業規管愈嚟愈嚴,牧場終於响八十年代摺埋

格格不入嘅前牛奶公司基層員工宿舍

今日先去舊嘅牛奶公司基層員工宿舍外圍睇一睇,佢嘅外牆同幾年前一樣都仲係搭上一層綠色嘅紗網。這兩幢建築物,外型好似當年嘅七層徙置屋。由馬路望上山邊,佢哋就似兩隻怪獸睥住山谷入面嘅牲畜同牧草咁,勁巖巉。

草蘆似個圓型嘅堡壘

草蘆

離開宿舍,我哋就去搵草蘆。就算當年成個山谷都種滿象草,不過冬季生長比較慢,所以就起咗好多個草蘆嚟收埋, 後來甚至要由外地進口禾草嚟做飼料。成個牧場範圍原本有好多個草蘆,而呢個聽講係現存唯一完整的遺址。呢個草蘆三層樓高,似個圓型嘅堡壘,塔頂係圓錐型,好骨緻

高處眺望呢一帶

生態熱點

影一陣相,我哋就沿住山路行到一個配水庫天台嘅公園,响高處望呢一帶嘅景色:香港第一個水塘--薄扶林水塘。然後跟住近排於對蟲鳥等生態拍攝得心應手嘅老死,追蹤一個又一個嘅生態熱點,睇到生平第一隻龍眼雞。以前掛住响龍眼樹同荔枝樹度搵佢哋,原來只係無緣。可惜尐龍眼雞,被一班嘈嘈閉嘅人類嚇到鳥獸散。

上:中国壁虎嘅蛋;下:龍眼雞

港府嘅保育態度

疫情關係,無緣入伯大尼修院參觀,唯有匆匆路過。至於由牛奶公司舊高級職員宿舍保育成為嘅薄鳧林牧場,仲未開幕,又無得睇。進入牧場遺址近海灣嘅區域,一條古蹟石柱就竪立响簡陋嘅垃圾站側邊,可見當局對於古物保育嘅態度,正正就係當睇佢唔到

港府嘅保育態度

牧場遺址

行無耐又見到一個大型水缸,大約八米高,天花冧咗,响厚度只有兩尺嘅牆壁上行,大家都小心翼翼。

小心翼翼行過大型水缸

然後就見到幾座牛屎池遺址。大家都對完整無缺果座無乜興趣,反而聚焦响冧淨橫樑果一座。因為陽光啱啱好射果落果邊,加上果條睇落危危乎嘅石梯同埋地面幾大塊芋頭葉,令到畫面更加豐富。我都乘機同小友人練咗一次膽

牛屎池遺址

幾十年過去咗,當然唔會再留低一尐痕跡或者一朕除,而呢度最終亦都回歸大自然,滋養呢片土地就算有GPS嘅引領,同埋前人留低下嘅絲帶記號,响叢林中間,都要摷一輪先可以去到最標誌性嘅牛棚。有人覺得牛棚嘅欄杆似尿兜,我就覺得佢似泊單車尐欄杆,反正咩人睇咩野。可惜山野嘅寧靜唔係必然,一堆五十人嘅行山大隊慢慢蒲頭,正正係人未到,聲先到。雖然佢哋有同伴提醒,影都未見就咪咁大聲,但係個別人士依然話之你。加上佢哋見住你影相都强行入鏡,我只好行埋一邊,寧願餵蚊。老死亦順便點醒個仔,做人有要品,千祈咪做埋尐咁嘅野

大自然攞番佢嘅土地
牛棚嘅欄杆

雞籠灣瀑布

搞掂,响風涼水冷嘅華富邨食碗麵,然後就順路落海邊行吓。相傳呢一個瀑布,正正係幾百年前外國商船嘅食水補給源頭,加上維多利亞深水港同埋九龍群山嘅庇佑,先至令到大不列顛流晒口水,改變我城嘅歷史。

雞籠灣瀑布

機槍堡壘

瀑布外面有一個機槍堡壘,對正南丫島,保護住進入維多利亞港嘅水道。香港保衛戰發生嘅時候,日軍無响呢度登陸,所以應該無戰鬥痕跡,不過就有傳日軍曾經响附近殘殺軍民。機槍堡上層嘅樓梯已經無咗,不過佢同天然岩壁形成九十度角,加上有樹根盤纏,又成就咗一個比年青人試練嘅好地方。

年青人試練嘅好地方

輕輕鬆鬆嘅全日行程,包含咗村落,水務,牧場,戰爭遺址同埋生態欣賞,仲有瀑布同海岸風光。你叫我點樣不愛香港嘅一草一木,一磚一瓦呢?

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

第一个支持了这篇作品
加载中…
加载中…

发布评论