力高

鍾意周圍去,嬉山亦嬉水。 想幸福地吃秋刀魚、 心情亂七八糟時吃蕎麥麵、覺得輸給世界時被抱一下。

《叔叔》- 沒為自己談過戀愛

雖然而家講戀愛自由,好似好過氣,但至少喺戀愛自由尚未被剝奪時,請盡情享受此權利,珍惜眼前人,誠實面對自己。坐等一切事過境遷先嚟追尋自我,身心或經已再派不上用場。

個人覺得電影《叔叔》重點唔在於,柏與海於年邁時如何艱難地為自己尋找愛情,而係佢哋相遇後,如何面對自我,如何對家人及自己負責、如何維繫、如何珍惜及付出。

總覺得世界主要分兩種人,一種人主要為自己而活,另一種人則為他人而活。先天性格決定命運,前者通常較自私,但活得更自在;後者通常較無私,但活得拘束。

《叔叔》之所以沉重,可能係因為,悲痛柏經歷一段輕掙扎後,無可奈何地承認並徹底成為後者。當年華老去時,以為終於可以做自己,以為終於可以無後顧之憂,卻偏高估咗自己可承受嘅重量,同時又計漏咗能經得起失去而狂妄嘅膽量。成全人哋定成全自己,柏選擇前者,將最真實嘅自己鎖於櫃裡,包庇自己、包庇別人、包庇比自己更重要嘅一切。

作為兩名主角身邊最親嘅人,不難發現端倪,好自然因為對方有秘密而有秘密。即使心知肚明對方有嘢瞞著自己,礙於彼此嘅私心,寧願難過,都唔揭穿真相。因為大家都明白,唔揭穿係因為愛惜對方,同時又明白事已至此,令事情最好嘅方法,係繼續接受對方嘅付出,盡能力令對方好過,令對方嘅付出顯得更值得。

《叔叔》港味極濃,每一場戲,都尤其突顯到香港人嘅生活及與人相處嘅模式。一系列簡單又平淡嘅日常片段,令香港觀眾對香港更有歸屬感。過節返屋企食飯、去街市買餸同呀姐講價、返屋企煮飯煲湯、食完飯坐喺梳化睇電視,冇刻意營造嘅情調,港味於每個細節滲啲又滲啲。就好似,明明都係一種煮法,都係同一碗飯,但完全分得出,呢碗飯嘅味道只有喺香港先食到。

劇情高低起伏唔大,亦冇好爆炸性嘅衝突。只透過各種各樣嘅小情節、簡單對話、人物反應及肢體語言,足以表達人物嘅內心掙扎、人物與人物之間嘅矛盾。劇情輕,情感重。又能突顯出香港人嘅家庭觀念、重情重血緣嘅特殊人格、香港人對同志嘅認知、社會形態等。


睇完之後,諗起《Call Me By Your Name》 Elio 爸爸同Elio講:「我哋嘅心同身,都係獨一無二嘅賞賜,不經已間,你嘅心已經枯竭,而你嘅身體都再無悅者。」 雖然而家講戀愛自由,好似好過氣,但至少喺戀愛自由尚未被剝奪時,請盡情享受此權利,珍惜眼前人,誠實面對自己。坐等一切事過境遷先嚟追尋自我,身心或經已再派不上用場。

日本動畫EVA:「人有兩種能力,一種係改變現況嘅能力,另一種係維持現狀嘅能力。」兩頭唔到岸係無能為力。如果有一刻,你終於認清自己係邊類人,請嘗試貫徹到底。其實喺呢個年代,冇咁多為世所迫,想要一個點樣嘅生活,其實有得揀。當試過一切方法都係唔work,要識妥協。因為,輸畀世界總比輸畀自己,更能說服自己多一點。

CC BY-NC-ND 2.0

Like my work?
Don't forget to support or like, so I know you are with me..

Want to read more ?

Login with one click and join the most diverse creator community.