辦公室膠事 - 遠距離的愛

今年對頹廢熊來講充滿挑戰，返新工，去咗從未做過嘅行業-製造業呀!

對比上一份工西人學校，工商行業標準工時就算冇OT都係長啲，人事方面雖然話度度都有衰人，工商行業啲人明顯複雜過學校，去到新環境新行業重新學習，加上熊返新工前係屋企hea 咗半年，返工好似係地獄。

新工騎呢人騎呢事都唔少，今日介紹下我的騎呢組員，一個係度做咗十幾年的老屎忽中女，男人的樣貌配一頭長直髮，比男人更壯更大份的身型，非常不幸亦係我下屬，唔知係佢不幸定我不幸，又或者係大家都不幸，呢條女人品唔好，非常陰濕，見我空降係佢上面，仲未做過廠，咩都唔識，睇人仆街最開心，經常想玩走我。

我上司是公司主席嘅老婆，Title 係執行董事，平時好少係公司出現，變相我report畀佢老公，即係集團主席，唔通我同個上市公司老闆講，我下屬蝦我咩 ! 咁on9，自己搞掂啦。

經歷幾個月奮鬥，我已將平日運作學上手，仲過埋 probation，成為正式員工，條女開始有所收歛，對我有避忌，講真如果可換咗佢，我一定會換，呢個時勢，工廠又裁員，啲阿頭攪盡腦汁交人，唔通我自投羅網冇叫我交人，我自己交佢出來咩，炒咗佢當裁員，唔會請番，到時做死我，為大局著想，必須忍辱負重。

林肯講過: 40歲後要為自己樣貌負責。生出來的樣冇得揀，人到中年，行為氣質加上歷練令容貌改變。

講番呢條女，佢嘅外型加上人品，基本上完全

冇男人會靠近，對佢有興趣，而且平時啲對話都係同啲八婆講埋啲無聊嘢，冇內容，同佢吹水都係浪費時間。

我哋公司係製造業，梗係內地有設廠，對呢位同事來講，要發揮女性魅力，只有靠內地工廠男同事了，因為對方睇唔到佢個樣，於是每日都聽到佢爹聲爹氣同某內地工廠已婚男同事溝通，日積月累，變成一段曖昧嘅關係。

熊一向唔buy愛情劇情情塔塔橋段，好似嗰啲好受歡迎嘅愛情韓劇咩星星、太陽、迫降呀，都引唔起我興趣，完全冇睇過。但係而家最新Netflix 《初戀》真係好睇，睇到流晒眼淚，自然唔做做作嘅主角，絕美的畫面，好多遺憾的

劇情......腰心腰肺。

陰公豬，嗰幾晚夜晚上睇完，個心chok chok下，然後日頭返工就睇呢位同事遠距離的曖昧，好大反差。特別係office好靜，因為裁員後大量吉位，我部門兩排partition 只剩低我同佢，挑逗的對話，挑情嬌笑，聲聲入耳（嘔！）。

上面工廠有香港人同事長駐，話說呢位男同事多次向廠內其中一個香港人同事要我部門同事的相，然後這香港人同事返咗來香港，同我講起呢件事，佢話：畀佢睇咗相見到好yap，冇晒胃口，點算好？

所謂得唔到係最好嘅，遠距離嘅愛情好浪漫呀！好似係Facebook一唔覺意add咗外國陌生人，就會收到大堆好鍾意你呀嘅message，新聞經常有網戀騙案，就係呢啲了，就算見唔到面，都可以成副身家畀人呃晒㗎！

同祖國的人溝通，最緊要加微信，條女就精了，每次被要求加信，只需要講：我冇微信。就搞掂了。

好吊癮！作為花生友，真係兩難，畀相佢等佢知道真相，定唔畀相佢，等佢哋繼續發酵好呢？